Awendia tin hopi hende ta haci cosnan robes, cu ta haci nan mes ridiculo, cu ta pone hende pensa cu di berdad nan ta serio of ta wega nan ta haci, of ta atencion nan mester.
Hende ta pretende cosnan cu di berdad no ta bon, y cu nan mes mester realisa cu e caminda cu nan ta den no tin nada bon pa nan , ni tampoco pa nan famia.
Hungando un bida di pelicula, cu ta pone hende papia riba bo, y despues nan ta rabia , bisa cu hende ta husga, of esun cu ta sin pica tira e prome piedra, pero locual nan ta pasando aden ta nan mes a busca.
Hende ta falta respet pa Dios, pa Dios su Palabra, y Dios su Principionan, y ta kere cu Dios lo sinta wak y no reacciona, pasobra nan ta kere cu Dios ta lubida, of Dios no ta mira, pero ta lubida cu e palabra di Dios ta bisa cu Dios no ta permiti ningun hende haci bofon di Dios, cu tur locual hende sembra , hende lo cosecha.
Pero den Bijbel tin un versiculo di saminacion, di pone atencion,cu ta demostra berdad y ta trece liberacion den bida di hende, cu tur hende por lese y pasa door di dje, y wak e di tur skina,haci pregunta, debati, consulta cu famia, consulta cu Mayornan , y amigonan, habri diccionario y busca, lese den varios idioma, y compara traduccion, busca bijbel di diferente religion, y wak bon ken ta cambia e palabra y sali for di e Berdad.
Pasobra ta tempo pa nos sa e Berdad y e Berdad lo haci nos liber. Y evita di tur manera pa nos ganja nos mes.
FILIPENSENAN 4:8-9 ta para scirbi: Finalmente rumannan:
Tur loke ta berdadero,
Tur loke ta honorabel,
Tur loke ta husto,
Tur loke ta puro,
Tur loke ta bunita,
Tur loke ta di bon fama,
Si tin algun virtud,
Y si tin algo digno di alabansa,
laga esakinan ocupa boso mente.
E cosnan cu boso a sinja y a ricibi, y a tende y a mira den mi,practica e cosnan aki,y e Dios di pas lo ta cu boso.
Cada biaha cu nos ta bay haci algo, of ta bay participa den algo, of nos ta papia algo, y hasta ora cierto pensamento crusa den nos mente nos tin di tene cuenta cu e dos versiculonan aki.
Pasobra diabel ta gusta tuma hende haci payaso, rebaha yuinan di Dios, pone nan pensa cu nan ta great , sexy y atractivo, fotogenico, y caba nan ta lubida cu nan curpa ta tempel di Dios y e Spirito di Dios ta biba den nan.
Nos ta bibando den un tempo cu inmoralidad kier tuma over, caminda respet no tey y hende a perde berguensa, hende ta comete cualkier locura basta nan hanja atencion, pero no ta tur locual e mundo ta aproba, Dios ta acepta, corda cu Dios ta lus y den dje no tin nada, pero nada di scuridad.
Hopi hende no kier caba di realisa cu Juan 10:10 ta un realidad di bida, y cu a bira tempo pa tuma e palabra di Dios na serio, y reconoce cu e diabel a bin solamente pa destrui.
Awor tuma un paar di seconde y refleha: E mesun curpa cu bo kier pa hende respeta, e mesun curpa bo ta expone casi sunu dilanti, bebiendo burachi,perdiendo tur respet pa bo mes y pa hende.
Samina bo curason y stop di ganja bo mes, no permiti e enemigo bruha bo cabes, Arepenti Awe.
Sinceramente, Pastor Marcel Balootje
