Ya pa 46 aña, Aruba ta celebra 18 di maart como e dia pa celebra himno y bandera di nos pais y e aña aki San Nicolas tambe a unifica su es na e celebracion aki riba e rotonde di FTA San Nicolas cu un obra di Arte di artista local Robby Solognier.. 

Den presencia di entre otro Palamentario Alvin Molina, San Nicolas Business Association, Aliansa Pariba di Brug, comerciantenan di San Nicolas, amigonan y un gran parti di famia, Tito Bolivar, director di ArtisA a hiba palabra gradiciendo pa e oportunidad di trese tur forzanan hunto no solamente pa celebra e fecha di comemoracion na e prome paso tuma  na 1948, na unda un mocion a ser entrega na Su Mahestad Reina Juliana, pa autodeterminacion di e pueblo Arubano, pero tambe pa pone enfasis riba e promesanan haci di haci y mantene San Nicolas e Art Capital of the Caribbean.

E bandera a wordo hisa dor di e hoben Loghan Michael Steenvorde di Grupo di Scouting Casibari, mientras cu e himno a ser canta dor di e ganadora di Concurso di Himno & Bandera 2022 Gismary Linarez.

Caha di Orgel Istela a deleita un y tur y San Nicolas Alliance tambe a duna nan presentacion.

Un gradicimento na Departamento di Cultura di Aruba pa nan colaboracion. Na tur cu tabata presente y asina ta pone un paso mas den e direccion di celebracionan cu lo ta tuma lugar un biaha mas na 2022. Un di e grandinan sigur lo ta Aruba Art Fair pa asina sigura e continuacion di embeyecimento di e cayana di San Nicolas, e murayanan y garantiza cu e fluho di bishitantenan lo keda crese cu cada dia cu pasa.

San Nicolas ya no ta e forgotten City, awendia e ta tumando pasonan serio pa mantene su titulo como e Art  Capital of the Caribbean y e centro di Arte y Cultura di nos pais.

LEAVE A REPLY

Please enter your comment!
Please enter your name here