Tocante e publicacionnan reciente di e Ehecutivo di Merca relaciona cu aplicacion di e tarifanan secundiario riba e paisnan cu ta cumpra crudo of derivadonan di petroleo for di Venezuela, Fuels Marketing & Supply Aruba N.V. (FMSA-N.V.) ta kere necesario pa duna clarificacion cu nan no ta cumpra ningun tipo di crudo of fuel for di Venezuela.
Aruba a ricibi un solo carga den februari 2024 bou di e lantamento general di sancion segun e Acuerdo di Barbados (Venezuela Sanctions Regulations 31 CFR Part 591 – General License No. 44). Ademas, Aruba a haya un licensia di OFAC for di e Departamento di Estado di Merca den mei 2024 pa fuel pisa (HFO). Sinembargo, esaki no a wordo uza pa motibo di preocupacion tocante factiblidad di suministro di e blend special di HFO cu WEB ta exigi.
Pa pone e hecho na cla:
For di prome 2020, tur fuel limpi cu Aruba ta importa (Gasolin, Diesel / ULSD y Jet A-1) ta bin di un refineria na Lake Charles, Merca.
Nos HFO blend ta bin for di Colombia, Panama, y St. Croix, pero NUNCA for di Venezuela.
Ademas, Fuels Marketing & Supply Aruba N.V. (FMSA-N.V.) ta un compania 100% gubernamental, comprometi cu bon gobernacion corporativo, e principionan democratico, y respet pa derecho humano — conforme cu e Gobierno di Aruba y Reino Hulandes.
Nos ta spera cu e declaracion aki ta kita tur duda tocante e tema den e prensa local.
