Comunicado di prensa di abogado Albert Kock, abogado di acusado.
SAYURI A PERDE SU BIDA ACCIDENTALMENTE.
E caso unda un hoben mucha muher (Sayuri Petronia) a perde su bida a bin hopi dilanti den prensa. Hasta na luna di juni 2023 ainda ta bin den prensa bisando cu Sayuri a ser “mata”, pues indicando cu Sayuri lo a ser “mata deliberadamente”. Publico pues ta bai pensa cu aki ta trata di un caso cu un hoben a ser asesina intencionalmente. ESAKI NO TA BERDAD !!
Como abogado di e mucha homber envolvi (IP) mi ta hanja mi mes obliga di splica e caso, awor cu Hues den promer instancia (eerste aanleg) a dicta sentencia y cu e mucha homber envolvi a apela e sentencia di hues na Corte Superior.
Hues di Eerste Aanleg (Corte) den su sentencia di 5 october 2022 a huzga como lo siguiente:
“Igual cu e Fiscal, Corte ta huzga cu for di e dossier (documentonan) y loke a bin dilanti durante tratamento di e caso a resulta cu e sospechoso IP NO tawata intenciona e morto di Sayuri. Huez ta sigi bisa cu e ta hanja su mes dilanti e pregunta si por papia aki di “voorwaardelijk opzet””
“Voorwaardelijk opzet” ta ora un persona a causa resultado di algo (manera morto di un persona) unda bo por bisa cu e persona, cu su acto, a expone su mes “a sabiendas y voluntariamente” na e chens grandi cu su acto lo POR causa morto di e otro persona. Pues ban bisa, bo NO tin e intencion di causa su morto pero cu bo acto irresponsabel bo a causa su morto.
Anto e Hues di Corte na Aruba a conclui cu tawatin voorwaardelijk opzet di IP.
Fiscal a pidi 9 anja y Hues a duna IP 9 anja di prison.
E anochi di e morto tragico di Sayuri tawatin 3 persona den e cas (IP, Sayuri y ZC). ZC a bin cu e arma, a pone riba mesa den sala. E promer cu a hunga cu e arma tawata Sayuri, luego IP, anto hungando cu e arma, e pia di e stoel di plastic blanco lo a dobla y dede di IP accidentalmente a primi riba e trekker (gatillo) di e arma, bala a sali y a dal Sayuri, cu net na e momento ey a lanta para, den su cabes. E unico persona presente como testigo tawata ZC. ZC na recherche y na Corte papiando cu Hues semper a keda ripiti e palabranan: “ E (IP) NO POR A YUDA”, pues bisando cu loke a pasa tawata un accidente.
HENDE NO POR IMAGINA SU MES UN ACCIDENTE MAS TRAGICO, pasobra Sayuri y IP tawatin bon amistad cu otro. Nan ta bisinja y Sayuri, manera un ruman muher grandi di IP sa scual IP ora e laga su cas y cura sushi. Tambe Sayuri sa trece cuminda pa IP, cu tawata bibando su so den e cas. IP tawata e momento ey un menor di edad di 17 anja, cu nunca antes a tira cu un arma. E tawata un mucha cu a cai den mal influensia di otro muchanan cu si tin mente criminal, y IP tawata bayendo asina den mal caminda. Pesey sera IP den Kia pa 9 anja NO ta un solucion. E mester hanja oportunidad pa ser poni den un Institucion pa menornan pa asina nan trata cu ne pa cambia su bida completamente. Ta hopi claro cu fiscal y hues di Aruba a dicidi di duna 9 anja pasobra e caso di IP a bin dilanti den publicidad como sifuera ta trata di un asesinato cruel intencional y Fiscal y Hues tin miedo di e opinion publico si nan no duna un castigo largo.
Pues como cu e sentencia di Hues di Corte di Aruba, pa loke ta e castigo, ta incorrecto y no ta cuadra cu decisionan den casonan similar, a apela e decision di Hues di Promer instancia.
Albert Kock
Abogado di IP
=============================================
