Tin palabranan silencioso, cu hopi hende ta evita menciona cu stem duro.
Cancer di Tripa ta un di nan.
E ta zona clinico. Complica. Incomodo. Pa hopi aña, screening di cancer na tripa a keda den e
huki ey – asocia cu hospital, preparacion medico, procedura y miedo. Pa hopi hende homber y hende muhe na Aruba, e pensamento ta cu: Screening ta nifica colonoscopia. Anto si screening
ta nifica colonoscopia, nan ta prefera di warda.
E pensamento ey ta locual Fundacion ABO – Stichting Aruba Bevolkingsonderzoek ta desea di cambia cu e campaña pa e programa di screening di cancer na tripa, CORESA, durante e luna di maart. Pasobra maart ta e Luna Internacional di Conscientisacion di Cancer na Tripa. Y e aña aki,
e meta no ta solamente reconoce esaki, sino introduci e siguiente paso.
E FIT-test.
No un idea di ultimo momento, ni tampoco un nota di menos importancia. Pero manera e
prome paso. Screening ta cuminsa na cas. E frase ey no ta un slogan. Ta un comienso nobo.
E FIT-test Fecal Immunochemical Test ta un instrumento di screening simpel cu por haci na cas. Door di haci uzo di e metodo simpel aki pa colecta bo af, por tuma un muestra chikito cu lo entrega pa analisis na laboratorio.
Un test sin motibo pa bishita hospital. Sin preparacion necesario y sin anestesia.
E test ta controla pa presencia di sanger cu no ta visibel cu wowo señal tempran cu, si wordo detecta na tempo, por cambia completamente e scenario. Tin un berdad cu nos no sa bisa:
Aruba Bevolkingsonderzoek
Mayoria hende no ta evita screening pasobra nan no ta interesa. Nan ta evita screening door cu
nan tin miedo.
Miedo di diagnostico.
Miedo di proceduranan.
Miedo di locual e por nifica.
E FIT-test ta kita e miedonan aki paso pa paso.
E ta separa screening for di hospital.
E ta separa prevencion for di panico.
E ta trece e prome paso bek den privacidad di bo mes cas.
Dr. Chris Franca, gastroenterologo y fundador di e programa, ta splica esaki simpel: “Screening no ta cuminsa cu colonoscopia. E ta cuminsa cu un FIT-test simpel na cas. Ora nos kita bareranan innecesario, mas hende ta dispuesto pa participa. Y deteccion tempran ta salba bida.”
Colonoscopia ta keda un instrumento medico importante. Pero e no ta e cuminsamento. E ta
wordo considera solamente si resultado di e FIT-test ta mustra cu evaluacion adicional ta
necesario. Pa mayoria di hende, e FIT-test ta e unico paso cu ta necesario.
Hende homber y hende muhe di 45 te 75 aña, asegura bou di AZV, ta eligibel. No tin necesidad di carta di dokter. Algun lo ricibi carta di Fundacion ABO den post – no como propaganda, sino como un invitacion organisa pa prevencion. Otronan por tuma contacto directamente cu
Fundacion ABO. Eligibilidad ta wordo verifica. Recogemento por wordo coordina na e localidad
mas conveniente di Lab HOH of na oficina di Fundacion ABO, cu awor ta ofrece oranan extendi
riba diahuebs anochi y diasabra mainta.
E ta structura. Simpel. Accesibel.
Durante luna di maart, presencia di Fundacion ABO ta notabel riba Aruba. Entrevistanan na radio. Programanan di television. Charlanan den comunidad. Sesionnan di salud y bienestar na lugarnan di trabou. Infobooth na Botica di Servicio, BENU, IMSAN, HOH y localidadnan strategico di pop-up. Na hopi di e eventonan aki, residente cu ta eligibel por registra y haya nan FIT-test mesora. Esaki no ta un lansamento chikito pero un introduccion di un test nobo
delibera.
Nanine Ponson, Directora di Fundacion ABO, ta visualisa esaki no como un campaña, sino como infrastructura: “Ora prevencion ta structura y accesibel, participacion ta bira algo normal. E ta bira parti di e manera cu nos ta cuida nos mes y otro. Nos ta mira nos comunidad responde cu seriedad y union”
Y kisas esey ta e cambio di mas poderoso. Screening pa cancer na tripa no mester ta algo cu ta
wordo susura. E por ta Practico, Regular y Responsabel. E por ta un acto chikito di cuido cu ta
sosode den privacidad di bo cas, prome cu sintomanan mes aparece. Screening ta diseña pa
hende cu ta sinti nan mes saludabel.
No ta trata di miedo. Ta trata di accion tempran. Y pa Aruba, e accion ey awor ta cuminsa cu
algo simpel – un kit chikito, un momento trankil na cas, y un decision cu ta bisa: Mi ta scoge
prevencion.
Pa haya sa mas of verifica bo eligibilidad:
Telefon: +297 588 1212
WhatsApp: +297 594 5020
Registra online: fundacionABO.org/BoAf
Adres: Caya Dr. J.E.M. Arends 17 (Localidad conoci di BOB Aruba)
Sigui @fundacionABO pa evenementonan y localidadnan unda nos lo ta presente den
comunidad durante e luna di maart.
