Durante e prome tanda di e reunion publico no .16 cu nos ta atendiendo e rapport di Carmabi, mi a habri enfatisando cu hopi di e preguntanan cu oposicion a haci awe ya a keda haci y a keda debidmente contesta durante nos encuentro publico di diahuebs ultimo.  Unico pregunta cu nos por haci ta, si enberdad oposicion ta interesa den e contestacion di parti Gobierno. Ta asta resalta cu mas bien nan djis kier sigui punta dede, sin kier mira atras y mas pio ainda indicando di no ta mucho interesa pa aporta y yuda pa yega na un solucion duradero pa nos pais. 

Paso realidad ta cu den e contestacion ricibi te awor, un cos ta resalta, Gobierno ta acepta y subraya nos realidad, un tristo realidad di berdad. Ya nan a tuma pasonan pa atende cu diferente puntonan di urgencia y plannan concreto a corto y largo plaso a keda presenta pa loke ta trata solucionnan pa drecha nos situacion. 

Awe un miembro di oposicion ta bisa cu tempo e tabata minister e no tabatin acceso na e rapport pero claramente diahuebs ultimo e director di DNM a enfatisa cu e la informa tur e 4 ministernan cu e la traha bou di nan desde 2019 debidamente di e observacionnan y e situacion di gravedad. Pregunta ta si ta e rapport e mester a lesa pa e kere y actua? Anto awe kier cuestiona otronan? Pasobra realidad ta cu ora e tabatin e posibilidad pa haci algo, e tampoco a haci nada. E tampoco a percura pa e balans necesario entre desaroyo economico di nos pais y su impacto riba por ehempel nos RWZInan y naturalesa. Pasobra nos no a tende nada di dje ora informacion similar y consehonan durante 2009-2017 tabata keda duna encuanto e situacion aki. Ningun grito, ningun preocupacion, ningun peticion pa realocacion di fondo pa inverti den RWZI, ningun exigencia pa prioridad a keda duna mientras miyones a keda inverti den Green Corridor, Watty Vos Blvd y asina nos por sigui menciona. Y awor cu desde 2020 e situacion ta hayando e atencion necesario tampoco un ta bon. Pueblo mester realisa cu e situacion enberdad ta delicado pero e ta hayando atencion, Gobierno tin e compromiso pa percura pa un solucion duradero y fondonan necesario pa realisa inversion a keda aloca. 

Ta un lastima cu oposicion completo no kier reconoce e trabounan cu a tuma lugar desde 2020 pa awor y aparentemente no a tuma nota of simplemente no kier compronde e presentacion di DOW di diahuebs ultimo caminda a trata extensamente e plannan tumando lugar y esnan pa futuro (te cu 2026).

LEAVE A REPLY

Please enter your comment!
Please enter your name here