Den bida di hende tin hopi caminda, tin caminda di paranda, tin caminda grandi di materialismo,tin caminda di inmoralidad, tin caminda di arogancia, orguyo, pleito, mentira,amargura, pero tur ta termina na mesun caminda, pasobra nan no ta ta trece ningun cambio tampoco crecemento den bida di hende, y locual nos tur por nota cu e cosnan bieu keto bay ta keda na bida, no tin nada nobo.
Pero ora nos gara na e caminda di berdad den Cristo Hesus , tur otro caminda di humildad, pasenshi, decensia,y integridad ta habri pa nos, y asina nos ta siña cana cu diligencia den e boluntad di Dios.
Cana den boluntad di Dios, solamente por sosode cu guiansa di Dios, pasobra tur caminda tin tentacion, y den tur cos diabel kier mete la pata, pa asina purba dobla e palabra di Dios.
Nos mester tene cuenta cu tin gran beneficio , ora nos obediencia na Señor cual ta hiba nos na diligencia.
Diligencia ta nifica cu tur ora y tur momento, nos ta dispuesto pa sirbi Dios, no ta importa na unda nos ta,e posicion cu nos tin, e trabao cu nos ta haci, cu of sin placa, nos ta obediente na Señor, ( Daniel Capitulo 6).
Den Juan 15:14 Hesus a bisa: Boso ta Mi amigo,si boso haci lo ke Mi ta bisa boso.
Si nos no ta cana den boluntad di Dios, nos no tin comunion cu Dios, ni tampoco amistad cu Dios, nos ta djis haci manera nos ta cu Dios, pero e curason ta leu for di Dios.
Prueba di esey nos ta mira bon cla, ora temor di Dios no ta presente den den nos bida, ora tur cos ta normal y tur cos ta aceptabel, e respet pa nos mes y pa hende a cay atras, y nos ta pone locual ta di mundo prome cu Dios, enbes di duna Dios e prome lugar den nos bida.
Tin hopi caminda ta parce bon, pero su final ta hiba na destruccion.
E enemigo ta campeon den traha caminda falso, yena cu scuridad, envidia , malisia y esclavitud, pa hende cay aden, y asina mantene hende den su gara.
Ora nos ta cana diligente den Señor nos encargo den Señor lo aumenta, pasobra Dios ta mira fieldad den nos y E mes lo move nos di nivel ( Mateo 25:21).
Pero duda y flohera, ta pone nos kere den nos mes, y no ta obediente na e palabra di Señor.
No cu mi a alcansa esaki caba, of cu mi a bira perfecto caba,ma mi ta haci tur mi esfuerso, pa mi por gara e loke pa cual mi tambe, a wordo gara door di Cristo Hesus. Rumannan mi no ta pretende cu mi a gare caba,ma un cos mi ta haci lubidando loke ta keda atras,y aspirando na loke ta dilanti, mi ta haci tur esfuerso pa alcansa e meta, pa haña e premio di e yamada celestial di Dios den Cristo Hesus.( Filipensenan 3:12-14).
Caminda e Spirito di Dios ta tin libertad, pero e libertad cu nos tin ta pa nos cana cu diligencia den e precioso boluntad di Dios, haciendo oracion, lesando nos Bijbel, buscando Santidad, y cu yudansa di Dios , aparta for di tur clase di trampa di e enemigo.
Si nos kier mira diligencia di Dios, manifesta den nos bida, nos mester entrega nos bida completo na nos Señor Cristo Hesus, y depende riba Señor, pasobra eyden tin crecemento, tin sabiduria y tin revelacion di Dios.
Nos ta bira un instruemento den man di Dios pa tur bon obra.
Sinceramente, Pastor Marcel Balootje
