Nos a scirbi varios biaha tocante 2 Timoteo 3:1-5 tocante e tempo trabahoso cu nos ta bibando aden.
Nos a scirbi con hende su karakter y conducta lo cambia y cu tur su consecuencia.
Nos ta bibando den un tempo cu hende a distancia nan mes for di ensenansa berdadero di e palabra di Dios, y ta kere den fabula.
Nos ta bibando den un tempo cu hende ta bisando cu Bijbel ta anticua, y cu ta hende a scirbi Bijbel, pero nan ta lubida di bisa cu e Bijbel ta inspira door di e Spirito di Dios. Pesey tin hopi hende cu no ta haci oracion den nan cas hunto cu tur nan yiunan, y pesey tambe tin hopi cu no ta bishita cas di Dios.
Tin hopi mayor a lubida cu nan tin un responsabilidad dilanti di Dios cu nan yiunan.
No ta pornada e palabra di Dios ta bisa den Proverbionan 22:6: Instrui e mucha den e caminda cu e mester cana, y hasta ora cu e bira bieu e lo no aparta su mes for di dje.
Efesionan 6:4 ta bisa: Boso tatanan no provoca boso yuinan na rabia, ma lanta nan den e disiplina y instruccion di Senjor.
Mira yuinan ta un herencia di Senjor,y fruta di barica ta un recompensa( Salmo 127:3).
Ora un mayor ta bay contra palabra di Dios, y contra ley terenal pa complace su yiu, of sostene su yiu den cosnan inmoral,impuro,e ta bira un mayor delincuente, pasobra ora bo sa cu no por y toch bo ta permiti bo ta bira complice.
Tene bon cuenta cu ley terenal y cu Dios, pasobra pa tur dos como mayor bo ta responsabel.
No cumpra ningun clase di vehiculo di motor pa un mucha menor di edad.
No fia bo yiu bo auto pa e sali, sabiendo cu e no tin rijbewijs.
No sinja bo yiu bebe alcohol,
No sinja bo yiu usa droga.
No sinja bo yiu sconde maldad, malicia, of inmoralidad pa bo, pa e keda keto y no papia.
No cumpra ningun clase di arma pa bo yiu.
No permiti e joncuman of chick di bo yiu ta pasa weekend den camber cu otro den bo cas.
No laga e mucha ta dicidi kico e ta haci pero mantene displina y respet den bo cas.
Bo mester tin yabi di e porta di camber di bo yiu.
Bo mester por drenta den camber yiu pa asina por controla pa limpiesa y tur cos na ordo.
Ningun caminda ta para scirbi cu un yiu tin un privacidad den cas di su mayor cu mayor no tin nada di bisa.
No complace cu bagamunderia,pa bo yiu keda contento.
No ta tur amigo cu bo yiu topa riba caya e por hinca den cas.
No custumbra bo yiu cu tur locual cu e haci bo mester dune placa.
Un yiu mester sinja haci trabao di cas, pasobra si no ta asina, e educacion di bo yiu no ta completo.
Y tur yiu mester wordo trata igual, trabao di cas no ta pa mucha muher so.
Como mayor bo mester zorg pa bo cas y bo famia, pa nan tin cuminda riba mesa y panja pa bisti.(1 Timoteo 5:8).
Como mayor bo ta responsabel pa e bida social y spiritual di bo yiu, pesey oracion na cas ta necesario, mescos tur hende den cas mester bishita cas di Dios.
Como mayor nos ta bibando den un tempo cu nos tin cu para firme, pasobra diabel no ta haci wega.( Juan 10:10).( 1 Pedro 5:8) (Romanonan 10:9-10).
No sea un piedra di trompica pa bo yiunan.
Sinceramente, Pastor Marcel Balootje
