Djabièrnè dia 11 di febrüari 2022 sra. Alexandra van Huffelen (1968), sekretario di estado den e Gabinete Rutte IV, a realisá un bishita di kortesia na Parlamento di Kòrsou.
E bishita aki tabata su promé bishita komo sekretario di estado na Kòrsou i e otro islanan den Reino Ulandes. Anteriormente sra…. van Huffelen tabata sekretario di estado enkargá ku asuntunan di finansa di 11 di yüni 2019 te ku 29 di yanüari 2020. E tabata miembro di Senado Ulandes (Eerste Kamer) i diputado enkargá ku e kartera di asuntunan duradero den gobernashon di e Munispio Rotterdam.
Vise Presidente di Parlamento, sra. Corrine Djaoen-Genaro, i miembronan di Komishon di Reino, Relashonnan Interparlamentario i Relashonnan Eksterior, sra. Giselle Mc. William, sr. G. Doran, sr. Quincy Girigorie i sr. Michelangelo Martines a risibí e sekretario di estado i su delegashon ku tabata konsistí di sr. Maarten Schurink Sekretario General di e Ministerio di Asuntunan interior i Reino Ulandes, sr. Henk Brons Direktor General di Asuntunan di Reino, sra. Saskia de Reuver Direktor di Asuntunan di Paisnan den Reino, sra. Nicky Kattenbroek asistente polítiko di e Sekretario di Estado, sra. Petra Huijser bosero di e Sekretario di Estado, E representante di Ulanda na Willemstad sr. Erwin Arkenbout i su remplasante sra. Hildegard Nefs.
E bishita i reunion di sera konosí ku e sekretario di estado sra. Alexandra van Huffelen a bai den bon esfera. Di partidi Kòrsou sra. Mc William a enfoká retonan aktual manera e situashon di hòspital CMC, pobresa den pueblo i desafionan den sektor di enseñansa. Di otro banda tin pèrspèktiva pa medio di diferente fondo di garantia pa stimulá desaroyo i empleo. Parlamento ta konta ku un relashon ameno i fruktifero ku e partnernan den gobernashon Hulanda.
