Ta necesario pa corta gasto den AZV awor
Gradus di CAFT tambe a elabora riba AZV. El’a bisa cu na 2022 Aruba mester recorta 60 miyon florin. Mester cuminza corta awor, pasobra den 10 pa 15 aña e gastonan lo subi cu entre 150 cu 200 miyon florin. Reduci gastonan na AZV ta necesario awor.
Na final, ta gobierno mester duna placa na AZV. Pues, sea Gobierno lo mester bay duna MAS placa ( di loke no tin), of mester aumenta e prima di seguro y esey lo mester wordo pasa pa pueblo, y como consequencia ta cu e ta reduci e poder di compra di e cuidadano.
Por a compronde tambe cu Gradus a bisa cu pa 2021 nan ta accepta 40 miyon. Pues, kisas tin un desaroyo nobo cu Gradus a adelanta riba dje, pasobra te cu awor, tabata tin impase, unda cu Knops a para riba cu mester corta 60 miyon y no kier a accepta 40 miyon.
Pero, den palabra di Gradus, por compronde cu nan a accepta 40 miyon pa 2021, pero pa 2022 ta keda 60 miyon.
