Fitch Ratings a publica su ultimo actualisacion tocante Aruba, cu ta mustra un desaroyo positivo den diferente indicador economico y financiero. E agencia internacional ta indica cu economia di Aruba ta sigui supera expectativa, mientras finansa publico ta mustra resultado fuerte, debe nacional ta sigui baha y reserva internacional ta mantene un posicion solido. Aruba actualmente tin un rating BBB cu outlook positivo na Fitch Ratings.
Minister di Finansa, Asunto Economico y Sector Primario, mr. Geoffrey Wever, ta considera e actualisacion como un momento importante pa evalua e progreso cu Aruba ta haciendo tanto riba tereno economico como financiero. Fitch ta indica cu e economia di Aruba a sigui demostra mihor ehecucion cu inicialmente proyecta. Centrale Bank van Aruba a revisa e crecemento real di Producto Interno Bruto pa 2025 na 6.3%, mientras Fitch anteriormente tabata calcula un crecemento di 2%. Pa 2026, Fitch ta proyecta un crecemento economico di 3.7%.
Un di e puntonan cu ta resalta den e actualisacion ta e resultado di finansa publico. Fitch ta califica finansa di gobierno como fuerte. Durante e prome seis lunanan di 2026, gobierno a registra un surplus fiscal di Afl. 260 miyon, cu ya ta supera e surplus presupuesta pa henter 2026 cu 215%. A base di e desaroyonan actual, Fitch ta proyecta un surplus fiscal di 3.6% di PIB pa 2026, compara cu 1.5% presupuesta, y un surplus di 3.1% pa 2027.
Na mes momento, e debe di Aruba ta sigui baha. Segun Fitch, e debt-to-gdp ratio a baha te 62.9% na final di segundo kwartaal di 2026. Fitch ta proyecta cu e cifra aki por baha ainda mas te 59.2% na final di 2026. Den su analisis, Fitch ta relaciona e reduccion rapido di debe, entre otro, cu un compromiso fuerte cu maneho responsabel di finanzas publico, mientras e agencia tambe ta señala e reto cu ta existi pa ehecuta inversionnan di capital segun planificacion.
E resultado financiero ta bay man den man cu un economia cu ta sigui mustra resiliencia. Fitch ta indica cu turismo ta mantene su posicion como un motor importante di crecemento economico. Durante e prome siete lunanan di 2026, cantidad di bishitante a aumenta cu 11.3% compara cu e mesun periodo di 2025, yega na 1 miyon bishitante, mientras cantidad di bishitante di crucero a aumenta cu 6%.
Otro elemento importante ta e posicion externo di Aruba. Reserva oficial a aumenta di USD 2 biyon na december 2025 pa USD 2.5 biyon na mei 2026, equivalente na 8.2 luna di pago externo corriente. Fitch ta indica cu esaki ta considerablemente mas halto cu eaverage di cinco luna pa paisnan den categoria BBB y ta duna Aruba un buffer importante contra posibel shock externo.
Fitch tambe ta dedica atencion na progreso di e Rijkswet Houdbare Overheidsfinancien Aruba (HOFA). Segun e agencia, aprobacion di HOFA lo resulta den un reduccion di e tasa di interes riba e fiansanan di pandemia cu Hulanda y lo crea acceso pa Aruba na financiamento di capital via Hulanda na condicionnan favorable.
Minister Wever ta enfatisa cu e ultimo actualisacion di Fitch mester wordo mira den contexto di un proceso continuo di fortalece economia y finansa publico. E resultado positivo no ta kita e necesidad pa sigui mantene disciplina presupuestario, sigui baha debe y, na mesun momento, crea espacio pa inversionnan cu Aruba tin mester pa sostene su desaroyo economico y social.
E ultimo actualisacion di Fitch no ta duna un rating nobo. Aruba ta mantene su rating BBB cu outlook positivo, despues cu Fitch a subi e rating di Aruba na BBB na maart 2026. E actualisacion di 15 di september ta ofrece e informacion mas reciente tocante e desaroyo di credito y e expectativa economico y fiscal di Aruba.
