Si un hende ta kere cu e por ganja Dios, el malamente equiboca, pasobra ningun hende no por ganja Dios, Dios conoce tur cos di tur hende,
No lubida cu ta Dios a forma nos tur den barica di nos mama, E conoce nos comienso y tambe nos fin, E sa ki ora nos ta papia berdad y ki ora nos ta papia mentira.
E conoce cada intento di nos pensamento,E tin poder pa mira kico nos ta forma den nos curason, E tin control di nos mente, pasobra ta e a traha tur cos.
No tin ningun caminda cu hende por huy bay for di presencia di Senjor. E tin henter nos bida den su planta di man.
Nada cu nos haci no ta sorpresa pa Dios, pasobra prome cu nos haci algo , Dios ta na altura.
No ta cumbini ningun hende haci malo , biba den inmoralidad y malicia,perversidad y abominacion, y despues bisa ta su bida priva, pasobra e ta perde su tempo, pasobra Dios sa tur cos di su bida, e por sconde pa hende , pero pa Dios e ta perdiendo su tempo, pasobra dilanti di Dios , tur cos ta den lus.
Mas ainda no ta cumbini, No ganja boso mes, Dios no ta laga hende haci bofon di dj’E, pasobra loke un hende sembra esaki tambe e lo cosecha. Pasobra esun cu sembra pa su mes carni,lo cosecha corupcion for di e carni, ma esun cu sembra pa e Spirito lo cosecha bida eterno, for di e Spirito.( Galationan 6:7).
Dios ta husga tur pensamento y intencion di curason, No tin ningun criatura scondi pa Su bista, ma tur cos ta habri y bisto dilanti di wowo di Esun cu nos tin di haber cune.( Hebreonan 4:13).
Dios ta bon na altura ora un hende ta pensa maldad den su curason, pesey semper Dios ta duna hende:
Tempo pa arepenti,
Tempo pa confesa,
Tempo pa bini bek riba e bon caminda,
Tempo pa sali for di scuridad y bini na e lus di Dios,
Tempo pa sali for di e bida di mentira y scuridad di diabel.
Pasobra ningun hende por bisa cu e ta felis, bibando for di boluntad di Dios, e diabel ta e mentiroso, e gran formador di bagamunderia kende por haci hende sabi bira ciego den maldad.
E wowonan di Senjor ta tur caminda,vigilando malo y bon.( Proverbionan 15;3).
Pasobra wowo di Senjor ta move bay bin door di henter tera, pa E por sostene fuertemente esnan cu nan curason ta completamente di dj’E.( 2 Cronicanan 16:9).
Esun cu sconde su picanan lo no prospera,ma esun cu confesa y laga nan lo hanja misericordia.( Proverbionan 28:13).
No tin ningun disfras cu por sconde maldad dilanti di Dios, Dios ta trata cu nos tur abiertamente manera mester ta, diabel ta esun cu ta hinca den cabes di hende pa nan sconde despues cu nan haci pica, mescos cu e a haci cu Adam y Eva den paraiso, pero no tin caminda cu hende por sconde, y no tin nada cu hende por haci cu Dios lo no saca na claridad.
Berguensa ta bini ora nos sigi ganja, sigi sconde cos, te na momento cu Dios bisa ta basta, pasobra Dios ta mira tur curason, di tur hende, y tur hende mester duna cuenta na Dios di nan propio hechonan.
Pesey e oportunidad di arepenti, confesa, aparta y ricibi pordon di Dios, y kere den Su Yiu Cristo Hesus pa salbacion di nos alma, ta di gran balor.
Dios conoce nos curason.
Sinceramente, Pastor Marcel Balootje
