Hopi hende ta kere cu bo por hunga cu scuridad y keda bon, hopi no ta kere cu si bo no tin Cristo den bo bida, como Señor y Salbador, bo chens di cay y keda pega den trampa di diablo ta grandi.
Hopi hende no ta consiente ,cu si bo no kere den Cristo Hesus manera e palabra ta bisa, bo ta bibando bao di condenacion. ( Juan 3:16-19).
Hende ta kere den religion enbes di busca un relacion berdadero cu Cristo, pasobra na mundo tin masha hopi religion, pero solamente ta un Salbador tin,su nomber ta Hesus Cristo di Nazaret.
E ta nos unico Salbador, asina ta cu no ta religion ta salba hende, pero si bo confesa cu bo boca Hesus como Señor y kere den bo curason cu Dios a lant’E for di mortonan, lo bo ta salba.
Cristo Hesus a muri na crus y a lanta e di tres dia for di morto.
E prueba grandi ta cu den tur otro religion e fundador ta morto y ta dera, pero solamente e graf di Cristo Hesus ta bashi, pasobra E a resusita y a subi na cielo y ta sinta na man drechi di e Tata.
Y E a duna nos autoridad pa para contra forsanan di scuridad den Su nomber, e palabra di Dios ta siña
nos cu nos lucha no ta contra carni y sanger, sino contra e gobernantenan, contra e podernan , contra e forsanan mundial di e scuridad aki,contra e forsanan spiritual di maldad den e lugarnan celestial.
Tur decisionnan robes cu hende tuma contra boluntad di Dios, y contra principionan di Dios su palabra ta influencia door di podernan di scuridad, cual ta podera di nan mente y asina pone nan rebeldia contra Dios. E podernan di scuridad ta asina fuerte cu nan ta pone nacionnan y nan gobernantenan contra e palabra di Dios.
Hopi ta busca podernan di scuridad especialmente den bruheria pa yega y permanece na poder pa largo tempo, hopi ta kere cu pa nan ta fuerte nan mester tin dominio diabolico riba otro, pero un cos nos tur sa cu ora bo tin Cristo Hesus den bo curason y bo tin un bida di oracion, ningun bruheria por domina bo bida, pasobra e Sanger di Cristo Hesus cu ta cubri bo, tin mas poder cu tur bruheria y maldad.
E palabra di Dios ta bisa: Esun cu ta bisa cu e ta den lus y sinembargo ta odia su ruman ta den scuridad te ainda.
Esaki ta nifica cu tur hende cu ta envidia,odia,hende cu orguyo, domina pa arogancia,
hende cu no kier pordona,
hende cu ta tuma e berdad di Dios cambie pa mentira,
hende cu ta ninga di acepta Cristo como Señor y Salbador ,
y tur hende cu ta haci bofon di Dios, ta biba den scuridad.
Esun cu ta odia su ruman ta den scuridad, y ta cana den scuridad, y e no sa unda e ta bay, pasobra e scuridad a ciega su wowonan.(1Juan 2:9-11).
Pasobra maske nos ta cana den carni, nos no ta bataya den segun carni, pasobra e armanan cu nos ta bataya,cune no ta carnal, ma poderoso, den Dios. Pa basha e fortinan abao, y pa destrui speculacionnan y tur arogancia, cu ta wordo lanta contra e conocemento di Dios,hibando den cautiverio tur pensamento, pa haci nan obedecido na Cristo.Y nos ta cla pa castiga tur desobedencia, unabes cu boso obedencia ta completo.(2 Corintionan10:3-6).
Señor no ta keda sin duna loke ta bon, na esnan cu ta cana den rectitud.( Salmo 84:11).
Sinceramente, Pastor Marcel Balootje
