Den Salmo 23 David ta expresa su mes di e forma aki: Bo ta prepara un mesa mi dilanti den presencia di enemigonan , Bo ta ungi mi cabes cu azeta, mi copa ta yen te basha over.
Locual cu David kier splica ta su confiansa den Senjor cu hasta riba su enemigonan e lo triunfa pasobra Senjor ta cune.
Senjor lo dune victoria den presencia di esnan cu ta haci bofon di dje, esnan cu ta pensa cu e lo no logra , of esnan cu ta trata di intimida su persona.
Nos tur sa di e bataya di David y Goliat, cu aunke Goliat tabata grandi y experiencia, y tambe e tabatin un ehercito grandi hunto cune, David pa medio di confiansa y Fe den Dios a derota Goliat, siendo cu Goliat tabata un militar y un gigante.
E sistema di mundo hopi biaha kier pone nos sinti nos mes chikito, y hasta forsa un pensamento riba nos cu bo lo no logra, pero ora nos tin Fe y confiansa den Senjor, Senjor mes lo duna nos e victoria pa asina mundo por compronde cu no ta cu forsa, ni cu poder, pero pa medio di Su Spirito.
Ta David mes ta esun cu expresa cu ni maske un ehercito acampa rond di mi lo mi no tin miedo, lo mi confia den mi Salbador.
Locual nos expresa cu nos boca esey ta locual ta conta pa nos bida, cu den momentonan dificil, nos ta papia palabra di encurashamento cu nos mes, pasobra locual un hende papia esey ta locual e ta ricibi,bo mes palabra ta lanta bo y bo mes palabra ta kibra bo.Locual ta sali for di bo boca esey ta conta pa bo bida.
Si for di bo boca ta sali keho y murmuracion, y bo ta lubida kico Senjor a haci pa bo, anto e ora ey bo ta cana den caya di derota, pasobra esey no ta boluntad di Dios.
Senjor mes ta encurasha nos bisando : Mil por cay banda di bo, y dies mil na bo man drechi, ma serca bo e lo no yega.( Salmo 91:7).
Senjor mes ta bolbe duna nos seguridad bisando: Ningun arma cu lo wordo forma contra bo lo no prospera, y tur lenga cu lanta contra bo den huzgamento lo bo condena. Esaki ta e herencia di e sirbidornan di Senjor, y nan hustificacion ta bini for di Mi.( Isaias 54:17).
Sea keto y sabi cu ami ta Dios,Lo Mi wordo halsa meymey di e nacionnan , Lo Mi wordo halsa riba tera.(Salmo 46:10).Den e Salmo aki Senjor kier splica cla cu ora nos keda keto Senjor lo bringa pa nos.
Isaias 41:10-11 Senjor ta bisa; No tene miedo, pasobra Mi ta cu bo,no desmaya,pasobra Mi ta bo Dios,lo Mi fortalese bo , si lo Mi yuda bo, si lo Mi sostenebo cu mi man drechi di husticia.
Mira tur esnan cu ta rabia cu bo , lo keda brongosa y deshonra, esnan cu ta pleita cu bo lo keda manera nada y lo perece.
Den henter e Bijbel semper nos ta mira palabranan di encurashamento pa hende por bay dilanti, Senjor ta Esun cu ta duna bida nobo den Cristo Hesus, e no ta corda nos riba nos pasado, y e no kier pa nos biba den derota.Senjor ta pordona, e ta separa nos pica nan for di nos, pasobra su palabra ta bisa cu si nos confesa nos pica E ta fiel y husto pa pordona y libra nos for di tur inhusticia.
Senjor ta Dios.
Sinceramente, Pastor Marcel Balootje
