Colegio Laura Wernet-Paskel (CLWP), e scol basico resorta bou di Stichting Katholiek Onderwijs Aruba (SKOA), ta carga cu orguyo e nomber di e señora Laura Wernet-Paskel d.f.m. Un señora cu tabatin un bida remarkabel cu pa awor lo ta conoci pa mayoria di e pueblo. Aki nos ta menciona algun ehempel di su pasonan extraordinario, sigur pa su temporada. Cu 15 aña el a bay Hulanda den barco. E a bay studia pa juffrouw di scol y na 1931 e a obtene su diploma. Banda di su trabou como maestra, boluntario e a dirigi negoshi di su famia hunto cu su casa. E tabatin un biblioteca na su cas, unda cu por a fia buki. Pastor, soeur y frerenan tabata haci bon uzo di e prestamento di buki aki. E a scirbi e buki na Hulandes ‘Ons Eilandje’. E tabata e prome figura feminino cu a subi un lista politico. E tabata un luchador contra inhusticia. E a lucha pa e derechonan di e hende muher y e tabata kier mira pa e hende muher haña mas participacion den gobierno.
Hasta na Hulanda nan a reconoce pa su meritonan. E aña aki Aruba a haya e grato noticia for di Hulanda cu a nombra un caya na e prominente Señora Laura d.f.m. E caya ta yama Laura Wernet-Paskelhof y e ta keda den e proyecto di construccion “Proefveld Erasmus” na Den Haag.Señora Laura d.f.m a nace 18 di februari 1911 y a fayece 8 di september 1962. Pa recorda señora Laura su 62 aña di fayecimento, nos ta invita e famia grandi di CLWP, sra. Laura su famianan, su conocirnan y tur otro cu ta aprecia tur loke e a haci den su bida, pa asisti diadomingo awor 8 di september na un Santo di Sacrificio di misa na Inmaculada Concepcion na Santa Cruz pa 6.30 di atardi. Alabez pa pidi nos Señor bendicion pa e aña escolar 2024-2025, pa gradici pa tur e bendicionnan ricibi y pa e bunita reconocimentonan cu sra. Laura ainda ta sigiu recibi despues di su partida di e mundo terenal aki.
