Sensualidad ta tur locual ta lanta e carni di hende y hibe den e deseo carnal of deseo sexual, y mas peor ainda por hiba hende na perversidad.
Awendia tin hopi cantica sensual combina cu video sensual cu ta hiba na inmoralidad sexual.
Tin hopi artista of mihor bisa influencer cu ta esey ta nan mercado, traha cantica Sensual, cu ta wordo combina cu alcohol y droga y asina habri mercado di inmoralidad.
Cada cantica cu palabra nan dobbel sinti, of cu ta papia di curpa di hende, y deseo di hende un pa otro ta lanta e carni di hende riba e Spirito y ta hiba hende na sensualidad.
Sensualidad ta pica ( Galationan 5:16-21) cual ta bisa nos:Ma mi ta bisa boso, cana segun e Spirito, y boso lo no cumpli cu e deseo di e carni. Pasobra e carni ta pone su deseo contra e Spirito y e Spirito contra e carni, pasobra esakinan ta contrario na otro, pa boso no haci e cosnan cu boso kier.
Tin hopi hende ta promove sensualidad sin nan sa , of nan sa masha bon y ta usa sensualidad como negoshi pa hala atencion di hobennan y adultonan cu no ta respeta nan mes y no tin temor di Dios.
No ta pornada e palabra di Dios ta bisa den 1 Corintionan 6:19 of boso no sa cu boso curpa ta tempel di Spirito Santo kende ta den boso, Kende boso tin di Dios y cu boso no ta pertenece na boso mes. Pasobra boso a wordo cumpra pa un preis, pesey glorifica Dios den boso curpa.
Awor nos ta comprende e lock cu tin riba hubentud cu sensualidad, pasobra constantemente nan ta scucha sensualidad den tur idioma, y ta mira short videos sensual riba telefon henter dia,y cada cantica nobo cu sali tin su parti sensual den dje pa lanta e carni, cual ta hiba na inmoralidad sexual, pasobra e enemigo sa cu sensualidad hunto cu alcohol y droga ta cuminda pa maldad.
Pesey como mayor nos mester tene bon cuenta kico nos ta laga drenta nos cas, ya cu ningun cantica no ta wordo sensura mas, ta parce manera tur esnan cu mester sensura cantica a pega sonjo of a bay cu vacantie.Pasobra pa sensura un cantica hende mester tin temor di Dios.
Awor a keda na cada mayor pa controla mas leu cu bo por kico bo yiu ta scucha y mira, pasobra e mundo ta yena cu sensualidad, y esnan cu ta gusta sensualidad ta haci negoshi cune, y cada rato bo ta mira mas material ta wordo inventa.
Romanonan 1: 21-32 ta splica nos con leu hende por yega ora nan ta esclavisa na sensualidad, nan comportacion sexual ta bay den perversidad.
1 Juan 2:15 ta splica tocante sensualidad, bisando : No stima mundo y e cosnan di mundo, Si un hende ta stima mundo e amor di e Tata no ta den dje.
Pasobra tur loke cu tin den mundo, e deseo di carni, y e deseo di wowo, y e orguyo di bida, no ta bin di e Tata sino di e mundo.
Laga nos comporta nos mes desentemente manera den dia,no de parandiamento ni den buracheria,no den inmoralidad sexual y den sensualidad,no den pleito y envidia.
Ma bisti boso mes cu Senjor Hesus Cristo y no haci provision pa e carni, pa cumpli cu su mal deseonan. ( Romanonan 13;13).
Den e ultimo tempo lo tin bofonadornan cu ta sigi tras di nan mes pasion perverso.
Esakinan ta esnan cu ta causa division, hendenan sensual, cu no tin e Spirito. ( Judas 1:18-19).
Sinceramente, Pastor Marcel Balootje
