Corte den prome instancia a dicta sentencia awe den e caso penal conoci como Flor, caminda cuatro sospechoso a wordo acusa di a comete violencia publico den Azia Restaurant riba 14 di november 2021 y destruccionnan. Un trahador di e restaurant a resulta seriamente herida.
Tur e sospechosonan, Y.T.M., K.H.W., A.C.D.W. y N.R.W.W., a wordo condena pa violencia publico.
Huez a ademas considera comproba cu e sospechoso N.R.W.W. a dal e sospechoso K.H.W. un mokete. Corte a rechasa e apelacion riba defensa legitimo cu a wordo hiba pa Y.T.M. y K.H.W.
Y.T.M. a wordo condena pa un castigo di trabao di 180 ora y un castigo di prison condicional di 2 luna cu un tempo di prueba di 2 aña.
Huez a considera comproba cu e sospechoso aki a causa lesionnan grave na e trahador di e restaurant.
T.M. tin cu paga un daño y perhuicio di 3.500 florin na e victima y huez a impone tambe un asina yama schadevergoedingsmaatregel riba dje.
E sospechoso K.H.W. a wordo condena pa un castigo di trabao di 40 ora cu un tempo di prueba di 2 aña.
E sospechoso A.C.D.W., kende huez ta considera autor di e incidente di violencia publico, a wordo condena pa un castigo di trabao di 120 ora y un castigo di prison condicional di 2 siman cu un tempo di prueba di 2 aña.
Finalmente e sospechoso N.R.W.W. a wordo condena pa un castigo di trabao di 160 ora y un castigo di prison condicional di 2 siman. E tempo di prueba ta 2 aña.
Corte den prome instancia tabata de acuerdo cu Ministerio Publico cu e caso aki a haci daño na e imago di Aruba como destinacion turistico safe. Turistanan y tambe ciudadanonan mester por sinti nan mes proteha y sigur ora nan sali pa diverti na Aruba.
