SITUACION CRITICO DEN SEPPA
Skirbi pa Gregorio Wolff
Awe nos ta bibando den un era unda nos ta papiando di Corporate Gouvernance cu su reglanan con pa administra un entidad y mas cu tur e integridad cu mester existi.
Tur dos ta asuntonan esential, pero den sindicalismo hopi biaha no ta factible. Hasta e reglanan básico di democracia cu su elecionnan ya no ta existi mas. Esaki ta tristo.
Elección ta e parti mas importante den un democracia. Y den sindicato democracia tambe ta bini na prome lugar, toch hopi sindicato no ta tene eleccion.
Integridad ta e alma di democracia dentro di un sindicato. Esaki no ta e caso den SEPPA y den varios otro sindicato
Puntra un miembro ki tempo tabatin e ultimo elecion den SEPPA? E no sa.
Democracia ta mara na e statutonan y reglamentonan interno di e sindicato den cual tin e metanan, e normanan y balornan sindical. Integridad ta importante ora e organonan dentro di e sindicato ta funciona.
Importante tambe ta información y formación den democracia, pero miembronan ta carece di información ariba e asunto aki.
Por ehempel den SEPPA, e información cu tur miembro mester ricibi ta kendenan actualmente ta forma parti di e comité ehecutivo, kendenan tin e maneho den SEPPA y kendenan ta miembronan di directiva, cual ta e órgano pa controla e maneho den SEPPA.
Structura di SEPPA
Te cu inicio di 2010, SEPPA tabatin un structura, unda cu un directiva tabata encarga cu e maneho y alaves cu control, e director tabata e presidente.
Na 2010, después di discusión di como 10 aña den congreso y otro organonan di SEPPA, a cambia e statutonan di SEPPA, unda e structura pa dirigi SEPPA a cambia. SEPPA tin un structura organico moderno unda un comité ehecutivo ta dirigi e sindicato y e líder máximo ta e Secretario General.
A bini un órgano nobo, cu e nomber “Directiva”, cual ta poni huridicamente ariba e comité ehecutivo, pues nan tarea principal ta pa controla e comité ehecutivo y tambe haci otro controlnan. E directiva tin un presidente cu autoridad limita, pero e mester dirigi reunionnan di directiva y congresonan. E función y tareanan di presidente, cu tur su tareanan di prome cu 2010 a pasa pa e Secretario General.
Pues e función di líder maximo di SEPPA a keda igual, solamente a bini un cambio den e nomber, e líder máximo cu tabata yama Presidente a bira Secretario General.
Den e statutonan bieuw di prome cu cuminsamento di 2010, den un articulo ta para cu e líder máximo di SEPPA of Presidente ta keda 10 aña y congreso por dicidi pa solamente un biaha, pa alarga e periodo aki cu 2 aña mas, pues maximalmente 12 aña e por keda.
Den e statutonan nobo ta para cu e líder máximo por ser religi cada biaha pa 3 aña.
Dor di un fayo no a pone e maximo di 12 aña pa un persona ehecuta un funcion.
Awe por bisa cu e structura nobo di SEPPA a fracasa, sea pa falta di capacidad pa cumpli cu statutonan o sea pa maniobra e lider maximo, secretario General Brito no a cumpli pa pone e structura nobo di SEPPA funciona.
Consecuencia ta, cu awe nos tin un lider maximo, Sra Brito, ya 22 aña den funcion, e ultimo añanan sin duna informacion, sin duna formacion y mas pio cu tur, no ta tene eleccion.
Kico ta e mihor forma. mara na periodonan pa un lider sindical funciona dinamicamente.
Tur caminda di mundo bo ta scucha cu e forma realistico, pa lidernan, sigur den mundo sindical, eherce nan trabao den forma dinamico, ta mara na periodonan.
1.Ora bo tuma un función nobo, como persona yen di entusiasmo pa eherce e función e prome añanan (3 pa 5), bo ta haci lo máximo pa siña e trabao (periodo di aprentice). On the job y cu otro formacionnan bo ta prepara bo mes pa eherce e función den e mihor forma.
2. Despues tin e periodo (+ 5 aña) cu tur dinamismo bo ta duna lo máximo na e organización, pa haci e trabao correctamente.
3. Despues di 10 aña ta bini e periodo di “Free Wheel”,
- a. bo ta tuma tur cos mas suave
- b. poco a poco e dinamismo ta cayendo,
- c. preparación y formacion no ta necesario mas,
- d. ta aparece e fenómeno cu yama flohera, ta yega trabao laat, ta traha 4 of 5 ora so,
- e. papiamento ta bira algo sin fin y sin bisa mucho cos,
- f. tambe ta haci su entrada e mentalidad pa maniobra, pa manipula, pa dicta mas y mas.
Mas largo e periodo aki dura, mas atrás e organización ta bay y igualmente e
persona(nan) envolví, maske nan mes no ta conciente di esaki.
Un táctica macabro pa no duna formación durante e ultimo añanan.
Comité Ehecutivo den SEPPA e ultimo añanan no a duna ningún sorto di formación.
Preparación y formación ta asina importante pa trece cambio den liderazgo y prepara e generación di relevo.E hecho pa no trece preparacionnan y ni formación pa lidernan nobo por ser mira como un táctica macabro y sigura e función di Secretario General pa sra Brito pa un tempo largo.
Sin formacion di lidernan nobo ta nace e argumento serca e lider maximo cu no tin lider pa tuma over. Aserca dor di no tin lidernan nobo forma, hopi lo bisa pa laga esun cu ta eherciendo e funcion di líder mes keda
Pero con cu wak e, pa miembronan y delegadonan conciente, un líder nobo ta hopi mihor cu un líder cu ya tin 22 aña den e función.
Pakico pasobra un persona cu mas di 12 aña como líder sindical ya no tin e dinamismo mas, su flohera ta aumentando cada dia mas y mas, igualmente e mentalidad pa maniobra, pa manipula, pa ta autoritario y hasta dicta.
Despues di 22 aña, miembronan mester ta cansa di un líder cu no tin e dinamismo mas.
E falta di dinamismo ta haci cu awe, no tin eleccion, no tin formacion, tampoco informacion, ni ta saca revista mas pa miembronan sa kico ta ser discuti den congreso anual y kico a pasa den SEPPA e aña cu a pasa y e aña vigente, kendenan ta lidernan di SEPPA, etc.. NADA!!
Situacion actual den SEPPA.
Den articulo 10 di statutonan di SEPPA ta para cu tur aña lo tin un congreso anual cual mester tuma lugar no mas tarda cu fin di november. Cada 3 aña ariba e ultimo dia di e congreso anual lo tin eleccion pa e diferente posicionnan. Durante e congresonan anual di 2010 y 2013, tabatin eleccionnan. Según statutonan, den e congreso anual di 2016 mester tabatin elección, miembronan no a lesa nada cu tabatin elecion. Tampoco den e congreso di 2017, 2018, 2019, 2020 y 2021. Pues hopi añanan cu no tabatin elecion. Informacion cu mi a ricibi ta cu, directiva di SEPPA eligi den e congreso anual di 2013, ya na 2014 a stop di reuni, pues no ta funcionando y ta un persona so a keda activo, cual no por.
E pregunta ta: Kende a controla e Comité ehecutivo, e maneho di sra Brito, e aumentonan di salario ya pa 8 aña?
Ora nos lesa articulo 19 lid 5 di statutonan di SEPPA, aprobación di cuentanan financiero ta ser aproba dor di directiva y ta duna Comité ehecutivo decharge. Si no tin directiva ta con esaki a sosode.
Mester menciona acerca cu e Jaarrekening di SEPPA pa hopi añanan caba ta ser traha pa un Register-Accountant, pero legalmente ta directiva ta duna decharge.
SEPPA, un sindicato grandi cu un bunita historia di lucha y logronan na fabor di trahador.
SEPPA ta e sindicato mas bieuw na Aruba (1939) un sindicato grandi, cu mas di dos mil miembro, cu un historia sindical bunita cu hopi lucha y logronan pa e trahador, cu e mihor infrastructura sindical na Aruba.
Un sindicato cu un historia di lucha, no solamente den accionnan ariba caya pero tambe na mesa di negociacion cu su posicionnan, mayoría di biaha por escrito.
E único sindicato cu su cooperativa, CAPA, unda miembronan por spaar recibiendo interes mas halto cu banconan local y cu e posibilidad pa haci préstamo cu interés abao.
Tambe SEPPA tin diferente areglonan pa su miembrecia. Asina tin hopi mas asuntonan y bentahanan ora bo ta miembro di SEPPA.
SEPPA tin su propio sede sindical bunita ya pa 16 añanan, cu un sala di Congreso grandi, pero dor di falta di dinamismo no tin cura y mondi a bira doño di e terenonan di SEPPA.
Miembronan y sigur tur delegadonan ban lanta para y hiba un discusión sano y trece cambio.
Prome, nos como miembronan di SEPPA, sigur e delegadonan mester rescata nos sindicato y pa cuminsa ban percura pa e tan anhela DEMOCRACIA den SEPPA prevalece dor di exigi pa tene eleccion.
Den e temponan moderno aki, unda no tin eleccionnan y bo tin un lider maximo pa ya mas cu 22 aña, esaki ta sosode solamente den organisacionnan sindical hopi autoritario, cu un tendencia dictatorial, unda e poder ta keda serca un persona, kende ta kere cu e ta doño di e sindicato.
SEPPA mester tuma como ehempel con un otro sindicato, FTA si ta tene su eleccionnan.
Den e articulo aki mi a indica con serio=malo e situación den SEPPA ta awe,un falta grandi di información, un falta di integridad, falta di formación di lidernan, falta di directiva cu ta funciona, pero mas cu tur, e falta di democracia cu su eleccionnan.
Laga nos spera cu sra Brito, despues di consulta cu su hendenan rond di dje, e mes ta pensa y analisa su maneho yen di fayonan, pa yega na e conclusion cu su dictadura no por sigui, e ta coy curpa, ta mustra berguensa y saca su conclusion.
Un discusión sano y reaccionnan di miembronan di SEPPA ariba e cambionan cu mester bin, na pia di trabao of den prensa of den cualkier otro medio, ta na su lugar.
Miembronan di SEPPA mester dicidi ariba e rumbo cu SEPPA ta bay sigui e próximo añanan.
