Diahuebs mainta, Accion di Bario a continua den e bario di Sero Patrishi. Apesar cu Prome Minister Eman no tabata presente pa motibo di salud, a ekipo dinamico di Accion di Bario cu ta consisti di FCCA, Bureau City Inspector, DOW, Serlimar, GKMB, Polis di Bario y ploegnan di limpiesa, a pone man hunto y a cuminsa transforma e cayanan.
Como parti di e vision di reforestacion, Hefe di Prensa di Gabinete AVP-Futuro sr. Marko Espinoza, hunto cu FCCA y BCI, a planta un mata di Ratonero y Tamarijn. Esaki como parti di e esfuerso pa trece 70% di nos matanan bek cu a bay perdi pa motibo di desaroyo. Mirando e ausencia di Prome Minister Eman, e ekipo di Accion di Bario a continua cu e compromiso ambicioso aki.
E cantidad di desperdicio den Sero Patrishi, mescos cu na e otro dos accionnan di bario, tabata enorme y tabata consisti di artefactonan electrico daña y muebles grandi cu e habitantenan a acumula den cura di cas, despues cu di forma abrupto, Gobierno anterior a cera e dump na Parkietenbos. Un total di 5 baki grandi di Serlimar a colecta yena cu desperdicio manera wasmachine, stoof, frigidaire, airco, sofa, cashi, mesa y hopi mas. Apesar di e cantidad di desperdicio aki, ta premira cu ainda falta 3 baki grandi mas pa completa e trabao di limpiesa.
E reclamo cu mas ta ricibi for di e habitantenan, ta cu nan no por paga e prijs halto pa deshaci di desperdicio grandi, cual ta pone nan acumula esakinan den cura di cas y ta crea varios mini dump den practicamente tur cura. Esaki cu tur consecuencia pa e higiena y salud di e propio habitantenan di e bario.
Pa e habitantenan di Sero Patrishi, locual mas nan tin mester di dje ta iluminacion den e cayanan, mirando cu esakinan ta hopi scur y ta afecta e siguridad di e cayanan durante oranan di anochi. Tambe e habitantenan ta desea di tin un rol mas participativo den decisionnan cu ta tuma relaciona cu nan bario, por ehempel den maneho di e canchanan deportivo y e areanan publico.
E habitantenan di Sero Patrishi tin animo y hopi ambicion pa nan bario, pero tin falta di recurso pa logra esakinan. Riba nan propio forsa nan ta purba mantene a sistema di irigacion operacional pa e cantidad di matanan di fruta cu tin tur rond den e bario, pero ta spera cu e plan di revitalisacion di e barionan di casnan social por yuda mehora nan bario.
Varios habitante di Sero Patrishi a expresa nan aprecio profundo pa e esfuersonan di Gabinete AVP-Futuro pa cu e barionan di casnan social. “Duna Cesar loke ta di Cesar, otronan ta esey si ta di bo Mike, bo a cumpli cu e bario”, tabata palabranan di Omar “el Gordo” Willems.
