Durante e presentacion nacional di e proyectonan di inversion di Gabinete AVP-FUTURO dilanti di Hulp Bestuurskantoor na San Nicolas, ciudadanonan presente a haya oportunidad pa scucha e plannan cu Gobierno ta preparando pa e proximo añanan. Den entrevista despues di e presentacionnan, varios di nan a expresa satisfaccion y speransa pa e cambionan cu e proyectonan por trece den nan bida diario. Entre e aspectonan cu a resalta den e reaccionnan tabatin e anuncio di e MFA di San Nicolas, e proyecto di benta di casnan di Colony, mehoracion di cayanan, Carnival Village y e renobacion di e parada di bus.
Servicio mas cerca di comunidad
E anuncio di e MFA di San Nicolas a genera entusiasmo entre e personanan cu tabata presente. Nan a destaca e importancia di por haya servicio den nan propio ciudad, sin mester biaha pa Playa pa cada documento of tramite. Un di e esnan presente durante e anochi a splica cu actualmente hasta pa busca un papel di 5 florin ta necesario pa sali di San Nicolas. Pa e ciudadano aki, e posibilidad di haya mas servicio den mes un ciudad ta representa un mehoracion practico cu por haci bida diario mas facil. Otro persona a expresa cu e ta contento cu e plannan y ta spera cu nan bira realidad pa comunidad por cuminsa disfruta di e resultadonan.
Cas y facilidad cu ta toca bida diario
E proyecto pa cas den Colony tambe a menciona como un di e plannan cu mas a impresiona. E reaccionnan a mustra cu e tema di cas ta ocupa un lugar importante entre e interesnan di e ciudadanonan entrevista. Carnival Village a ricibi reaccion positivo tambe, mientras cu e parada di bus a wordo destaca como un facilidad cu tin mester di atencion. Un persona a señala cu e parada ta bieu y cu tin problema di awa cu ta lek ora ta yobe. E observacion aki ta mustra con mantencion y renobacion di facilidadnan publico ta toca e comodidad di esnan cu ta uza nan. E mehoracion di asfalt riba nos cayanan tabata otro tema cu a surgi. Un di e personanan a papia cu satisfaccion di e trabou na e caminda pa Baby Beach y Seroe Colorado, recordando cu e tabata den mal estado.
Speransa pa mira resultado
E reaccionnan di e ciudadanonan a combina entusiasmo cu e deseo pa mira e proyectonan wordo realisa. Mas cu solamente e anuncio, nan ta spera e resultadonan: servicio mas accesibel, caya den miho condicion y facilidad cu ta atende e necesidadnan di pueblo. Esaki ta refleha con inversion den comunidad ta haya un significado den accion concreto di tur dia.
