E di dos parti di e Common Good Conference a sigui cu un sesion di atardi altamente inspirado, unda pensamento academico, experencia politico y dialogo humano a uni pa duna e bon comun un significado concreto y actual.
E sesion a habri cu un presentacion virtual live for di Scotland cu Profesor Iain McGilchrist, kende a pone e tono cu un vision profundo riba humanidad, conciencia y e necesidad di reencuentra cu balornan esencial den nos sociedad. Despues, Profesor Robertico Croes, ex Ministro di Turismo y Economia di Aruba, a comparti su reflexion riba liderato, desarroyo y responsabilidad social for di un perspectiva local y internacional. Tim Timmers, consehero legal den pasado cu a hunga un rol prominente den desmantelacion di Antiyas Hulandes, a sa di inspira esnan presente cu e aspecto legal pa cu e bon comun.
E programa a sigui cu un aporte di ex Primer Ministro di Hulanda, sr. dr. Jan Peter Balkenende, kende a enfoca riba e rol di balornan, gobernacion y etica den construccion di un sociedad husto. Profesor Govert Buijs a complementa esaki cu su vision riba e bon comun como fundamento pa cooperacion, comunidad y coexistencia den un mundo moderno.
Tur e oradornan a inspira e audiencia cu nan vision riba e bon comun, unda dignidad humano, inclusividad y coexistencia no ta palabranan bashi, sino e principionan central pa accion y liderato.
E prome sesion di atardi a cera cu un presentacion dinamico di Profesor Michael Sandel, kende a inclui e elemento interactivo, involucrando directamente e publico den un dialogo bibo riba moralidad, responsabilidad y decisionnan colectivo. E intercambio a reforsa e mensahe cu e bon comun ta algo cu tur hende ta parti di dje.
Cu e sesion di atardi aki, e Common Good Conference a confirma su impacto como un plataforma unico pa inspiracion, reflexion y accion, conectando bosnan internacional cu e realidad y futuro di comunidadnan.
