SETAR ta refleha bek riba aña 2024, un aña yena cu proyectonan grandi, inversionnan cuantioso y cu e enfoke semper pa duna bek na nos comunidad cu e meta pa haci un diferencia y yuda realisa cada meta. Como un compania nacional, SETAR ta dedica pa sigui contribui na economia, infrastructura, cultura, educacion y deporte di nos isla.
Treciendo innovacion
SETAR a inverti miyones den infrastructura di Fiber pa garantisa cu Aruba completo ta cla pa un futuro innovativo. Durante 2024, SETAR a traha pa conecta e districto di Noord, Savaneta, San Nicolas y un parti di Wayaca simultaneamente cu Fiber. E infrastructura di Fiber ta brinda nos clientenan un conexion stabiel, bon cobertura den cas y den futuro speed di Internet mas rapido. Actualmente nos tin mas cu 8.000 percela na Aruba conecta cu ta representa mas di 10.000 adres.
Banda di esaki, SETAR ta conectando nos clientenan riba e plataforma di IPTV y Wi-Fi Mesh. E sistema di IPTV cu su mesh ta mehora e cobertura di Wi-Fi na cas y tambe ta cambia e experiencia di wak television, cu un user interface completamente nobo, moderno y interactivo. Actualmente nos tin mas cu 20.000 cliente conecta riba IPTV.
Recientemente, SETAR a anuncia tambe un inversion di miyones pa CELIA, un kabel submarino nobo, cu lo garantisa conexion directo cu Merca pa e futuro generacion y cu Aruba ta integra den e economia mundial.
SETAR ta orguyoso di por a ehecuta e proyecto di Video Surveillance System den 2024 na e Operation Command Center na Savaneta, cu ta percura pa seguridad y vigilancia den areanan strategico rond di nos isla. Tambe nos ta orguyoso di por a lansa e version nobo di Aruba Health App, aportando cu tecnologianan innovativo pa modernisa e manera con nos ta pidi y wak nos informacion medico.
Otro proyectonan grandi cu SETAR ta trahando riba nan ta, entre otro, na St. Regis Hotel Aruba, unda cu ta instalando e prome solucion di Fiber To The Room (FTTR) na Aruba y diferente servicionan innovativo. SETAR ta trahando tambe riba e siguiente fase di e proyecto di Video Surveillance System y Wi-Fi pa Aruba Airport Authority (AAA), instalando camaranan cu ta brinda AAA visibilidad maximo.
Invertiendo den nos futuro
SETAR por medio di su proyecto di Fiber pa scolnan a inverti mas di 1 miyon florin pa conecta tur scol na Aruba riba Fiber. Actualmente falta solamente 7 localidad pa wordo conecta riba Fiber, p’asina tur scol na Aruba tin Fiber.
Den 2024, SETAR a partner cu Aruba Scholarship Foundation pa brinda nos studiantenan cu ta bay studia na Merca, Canada of den region e oportunidad pa ricibi un beca. Ademas, SETAR ta aporta pa di tres aña consecutivo na e Student Development Fund di Universidad di Aruba. SETAR su proyecto di Back to School, tur aña ta haci un donacion di 300 tas di scol y material na studiantenan cu falta material pa scol. SETAR su compromiso cu educacion ta un parti importante pa e compania, p’asina sostene e crecemento profesional di nos studiantenan cu ta nos futuro profesionalnan.
Conservando nos cultura
Pa SETAR, como nos compania nacional di telecomunicacion, preservacion di nos tradicion y nos herencia cultural ta di suma importancia. Nos ta orguyoso di por contribui henter aña na festivalnan, actividadnan y proyectonan cu ta promove, conserva y engrandece nos cultura.
Sin lubida Carnaval, nos celebracion cultural di mas grandi. Den 2024, SETAR a celebra e lustro di Carnaval 70 en grande cu e evento “Tribute to 70 years of Carnival Music”. Ademas, SETAR como sponsor oficial di Aruba su Carnaval ta partner tur aña cu SMAC y Musica pa trece e paradanan y actividadnan carnavalesco.
Aportando den deporte
SETAR den 2024 a partner cu nos campeon mundial Sarah-Quita Offringa como embahador oficial di SETAR hunto cu nos astro Chadwick Tromp. Hunto nos ta dedica na sostene deportistanan Arubano y inspira e siguiente generacion. SETAR durante henter aña ta aporta na nos atletanan y eventonan deportivo rond nos isla.
Construyendo un miho futuro
SETAR ta gradici cada cliente pa nan sosten pa haci’e posibel pa SETAR por inverti bek den nos pais. E esfuerso di SETAR no ta solamente tecnologia; SETAR ta aporta cu posibilidad, crecemento y ta crea progreso pa nos tur.
Deseando nos clientenan un Pasco magico, un Fin di Aña yena cu alegria y un 2025 bendiciona cu amor, exito y metanan positivo. Danki pa ta parti di nos famia!
