Un di e metanan di SETAR ta pa por garantisa cu su infrastructura di comunicacion pa yamadanan di celular ta disponibel na tur momento, p’asina su clientenan por haci uzo di esaki. Pa por realisa esaki innovacion ta esencial den e infrastructura. No obstante tur e retonan cu e pandemia a trece cune, SETAR hunto cu su partnernan a sigui cu implementacion di e proyecto cu ta encera upgrade SETAR su central di telefon pa yamadanan di celular y tambe e “Radio Access Network” pa e tecnologia mas moderno.
Den e mundo di telecomunicacion operadornan manera SETAR tambe ta moviendo pa un otro tipo di infrastructura, lagando e manera tradicional atras na unda diferente ekiponan ta wordo instala y cada un cu nan mesun funcion. Infrastucturanan nobo di telecomunicacion ya no ta wordo diseña di e forma aki. Awendia tur cos ta “software” y “virtualization”.
Den SETAR su caso semper a scoge pa tin dos central separa fisicamente di otro riba e isla. Esaki kiermen cu si e infrastructura na un sitio haya problema, e otro lo tuma e procesamento di yamadanan via celular over.
SETAR ta asina leu cu diaranson 12 januari den oranan di marduga lo bay haci e cambio pa e centralnan nobo. Esaki ta encera cu durante e oranan cu e trabounan lo tuma lugar lo tin interupcion di servicio pa un periodo di mas o menos 1 ora. Di e forma aki SETAR ta sigui inverti den su infrastructura pa por sigui brinda nos clientenan conexion na tur momento.
