Diabierna, 27 di februari 2026, e Vaste Commissie Financiën, Overheidsorganisatie, Cultuur en Sport (CFOCS) di Parlamento di Aruba, bou presidencia di mi persona, a tene un reunion importante cu e College Aruba financieel toezicht (CAft).
E encuentro aki tabatin un caracter particular debi na e cambio di mando den e colegio di supervision. Tabata e prome biaha cu e presidente nobo di CAft, sr. Hoogervorst, den su funcion nobo a reuni cu Staten. Alabes Hulanda tin un representante nobo kende ta sr. Hilbers. Hunto cu sr. Agunbero cu ta representante di Aruba den CAft nan ta forma e colegio di supervision.
Como Presidente di e comision, mi a resalta cu e reunion aki ta fungi como un dialogo habri cu sigur por yuda nos como miembronan di Staten den nos trabou di control. E intercambio di informacion aki ta crucial pa Parlamento por echerce su funcion di supervision riba e maneho financiero di nos pais.
Durante e reunion a trata temanan strategico manera:
- Overheidsfinanciën: E estado actual di e caha di Gobierno.
- Rijkswet houdbare overheidsfinanciën (RHOFA): cual por bisa cu ainda no tin consensus den sala di parlamento pa cu esaki.
- Deelnemingen- en dividendbeleid: E maneho rond di companianan estatal y nan contribucion, cu ainda Parlamento mester trata cu Gobierno.
- Governance: E transparencia y integridad den e structuranan di decision. Un punto hopi importante y crucial.
Como parlamentario nos mester sigui monitoria e desaroyonan aki, garantisando cu e decisionnan tuma ta na bienestar di e stabilidad economico y financiero di Aruba.
