Parlamentario Drs. Shailiny Tromp-Lee a expresa un preocupacion profundo tocante e patronchi di silencio cu ta caracterisa e liderazgo di e Minister President actual. Aruba ta enfrentando crisisnan real cu ta rekeri claridad y direccion for di e nivel mas halto di Gobierno, pero loke nos ta haya ta silencio.
“E pregunta cu hopi Arubiano ta haci nan mes ta simpel: unda e Minister President ta? No den Parlamento. No den conferencia di prensa. No ta den declaracionnan publico riba e crisisnan cu ta afecta bida diario di nos famianan. E silencio aki no ta accidental, e ta un escogencia consciente, un patronchi di sr Eman,” Tromp-Lee a declara.
E patronchi aki ta bisto. Na prome luga, e Minister President nunca a aparece den sala di Parlamento pa un debate y ta laga preguntanan formal sin contesta. Tampoco e ta duna conferencia di prensa den su funcion. Y riba costo di bida cu ta subi drasticamente, crisis constante den gabinete, insiguridad aumentando, y crisis di salud mental empeorando… e unico contesta ta silencio un biaha mas.
Riba HOFA, un Rijkswet cu gran mayoria di nos pueblo ta contra, cu ta bay directamente contra nos constitucion y cu casi nos por bisa cu nunca mas nos lo por sali di dje, e Minister President a firma, pero nunca a para dilanti di su pueblo pa defende ni splica su decision. Silencio atrobe.
Aworaki sigur Eman no ta cumpliendo: “Un Minister President tin e obligacion di papia cu su pueblo, di presenta na Parlamento, di contesta ora e pueblo ta puntra. Esaki no ta preferencia politico, esaki ta responsabilidad moral y constitucional.” Tromp-Lee a splica cu firmesa.
Aruba merece un liderazgo presente cu ta contesta ora e pueblo ta puntra y cu ta para firme pa nos autonomia. Un Minister President cu ta sconde pa debate y cu no ta papia cu su pueblo no ta gobernando. E ta simplemente yena un stoel.
