Siete aña pasa, nos comunidad a wordo sacudi pa un caso tragico di abuso di mucha cu consecuencia fatal. E tragedia aki a sirbi como un alarma pa mustra e retonan dificil cu nos ta confronta, manera abuso, violencia domestico y problema di salud mental. Gobierno y Parlamento di Aruba a reconoce e urgencia di e situacion, y na 2018, cu colaboracion di profesionalnan den e sector social, a elabora un plan di
accion di emergencia: Sociaal Crisisplan. Parlamento di Aruba a duna sosten unanime na e plan y su presupuesto, mustrando un consensus politico pa tuma accion inmediato. Esaki a demostra cu ora nos traha hunto, nos por logra un cambio positivo pa confronta e retonan social.
E Sociaal Crisisplan a duna un empuhe fundamental na e sector social y eventualmente algun proyecto a wordo incorpora den e presupuesto regular di Gobierno. Apesar di esfuersonan logra, situacionnan inespera manera e pandemia di COVID-19 a pone presion adicional riba nos comunidad. Actualmente, e sector social ta pidi un renovacion di union politico pa continua e trabou cu mas forsa.
Mi experiencia den e funcion di lider di proyecto e tempo ey a mustra claramenta cu pa combati e retonan social, ta esencial pa sincronisa e esfuerzonan di tur departamento y instancianan involvi. Mi a mira e oportunidadnan pa logra e sincronisacion aki y tambe e desafionan cu nos mester supera pa implementa un metodo integral na e retonan social.
Esaki ta netamente e motibo di mi compromiso. Mi ta determina pa, hunto cu profesionalnan den e sector y expertonan den e materia, fortifica e structuranan existente y crea mecanismonan pa un maneho integral pa asina por combati e retonan social den nos comunidad. E meta ta pa fortalese e union politico, pa asina implementa accionnan efectivo y eficiente den un manera coordina.
Despues di mi trabou den e sector sosial, mi a mantene contacto cu hopi profesionalnan cu ta dedica nan mes pa e causa aki. Nan merece haya e reconocimento, ya cu nan trabou no ta facil y ta exigi hopi atencion y dedicacion. Nan ta clave pa hasi e diferencia den bida di hopi hende den nos comunidad tur dia. Mester reconoce nan y duna nan e hermentnan necesario pa nan por yega na esnan cu mester di yudansa.
Esey mes ta e mensahe cu mi ta hiba di cas na cas: un apelacion pa logra e confiansa di nos pueblo, pa mi por duna mi aporte pa un desaroyo social cu ta sostene esnan vulnerabel y den mas necesidad den nos comunidad. Mi ta conta cu bo sosten y mi ta compromete mi mes pa representa bo cu respet y dignidad.
