Matrimonio a wordo institui pa Dios, como e formula responsabel pa multiplicacion di hende riba mundo, pesey tur hende ta bini di un Famia, pasobra a base di matrimonio, famia a bira realidad, y no tin ningun hende riba mundo cu no tin Famia.
Tur hende riba mundo a nace for di un relacion entre un homber y un muher.
Tur hende tin un mama y un tata, pasobra no tin ningun otro manera pa multiplicacion di hende cu no ta via di un homber y un muher.
Awor tin pilar cu ta sostene of mantene un matrimonio saludabel, y si nos wak bon ningun di nan no ta placa, pasobra bo no por cumpra hende cu placa, placa ta bini despues,pasobra placa no tin mas balor cu hende.
E shete pilar cu ta sostene un matrimonio ta: Dios, Amor, Confiansa, Respet , Fieldad , Comprondemento y Fe.
Na prome lugar ta bini Dios,pasobra Dios tin tur cos, mescos cu bo no por separa un taki for di un mata, bo no por separa un matrimonio for di Dios.
Hopi a purba hacie y no a resulta bon, pasobra Dios ta e ingrediente principal pa e matrimonio, un matrimonio sin Dios ta mescos cu un cuminda sin salo, of un koffie sin sucu, tur dos hende por husa, pero bo ta sinti cu falta algo.
A base di respet ta bini bon comprondemento, pasobra respet no solamente , mester wordo papia, pero e mester wordo biba, y respet entre pareha ta un testimonio, cu e yuinan tin cu mira y compronde e amor y stimacion cu tin entre nan mayornan.
Respet ta nifica cu nos ta balora otro, ni placa , ni tampoco material por pone nos falta respet pa otro.
Tene bon cuenta cu bo negoshi no tin mas balor cu bo matrimonio y bo famia, bo no por pone placa bo dilanti y lubida cu bo tin famia.
No laga diabel ganja bo, y hinca den bo cabes cu sin placa , nada no ta sosode, pasobra tin hopi hende riba e linja ey cu ta adora negoshi y placa y bandona famia.
Ora nos ta papia di amor, nos no ta keda solamente, na palabra, pero e tin cu bira un hecho, ta yega e momento pa demostra amor, pero esey no ta nifica solamente riba cama, cual ta un deber di tur homber y muher cu ta comparti matrimonio, pero amor mester wordo demostra tur caminda den cas, pasobra Dios ta amor y Dios ta tur caminda.
Anto amor ta wordo demostra den nos vocabulario, con nos ta comunica cu otro. Y eynan respet y balor ta bini un biaha mas dilanti, djey confiansa ta drenta, pasobra si un hende ta trata otro bon, nan ta confia otro, pero ora un hende ta trata otro malo no tin confiansa.
Si un hende ta bisa cu e ta fiel na Dios, y e no ta fiel na su esposa of esposo, e persona ey ta ganja su mes barbaramente. pasobra ta imposibel cu bo fiel na Dios, y bo infiel na bo pareha, pasobra e palabra di Dios ta bisa cu locual Dios uni no laga hende separa.
Den un matrimonio, mester tin un bida di oracion, pasobra ora un pareha casa ta uni den oracion, cosnan grandi ta pasa, pasobra eynan ta bini reconocemento di fout, arepentimento y pidimento di pordon, pesey e enemigo ta haci tur locual ta posibel, pa un pareha no ta uni den oracion, pasobra si nan haci esey Mateo 18:19-20 y milager ta bira realidad den nan bida.
Sinceramente , Pastor Marcel Balootje
