Diadomingo atardi a tuma luga e clausura di Festival Internacional di Literatura, Writers Unlimited, den e prestigioso sala di concierto Amare na Den Haag, Hulanda. Writers Unlimited a celebra su 30 aniversario, y pa e ocasion special aki, a invita escritora Arubiano Rosabelle Illes y cantante Shirma Rouse (St. Eustasius) pa forma parti di e jubileumshow. Illes a recita su poema, “Matches”, relaciona cu e tema di e festival, “Playing with Fire”. Na su turno, Rouse a interpreta e poema di Illes titula “Laga mi Biba”, y a incorpora e clasico “Plegaria” di Oswin Chin Behilia, creando un harmonia caluroso cu a conecta tres isla ⎯ Aruba, Korsou y St. Eustatius. Rouse a comparti su entusiasmo cu e publico como ta prome bes cu e ta canta na Papiamento riba escenario. Illes a expresa su gran honor pa mira un di su poemanan keda selecciona pa un interpretacion asina bunita den voz di e Queen of Soul di Hulanda. E poema ta forma parti di Rosabelle su coleccion nobo cu lo wordo publica den 2025.
Durante e festival, cu a tuma luga di 23 pa 26 di januari, Illes a presenta na varios ocasion, incluyendo, storytelling sessions hunto cu autor Sur Africano Rešoketšwe Manenzhe y studiantenan di e International Institute of Social Studies di Universidad Erasmus, un presentacion musical di su buki di mucha Curasonchi (Hartje) hunto cu co-autor Levi Silvanie (Korsou), un colaboracion unico conhuntamente cu musico Saartje van Camp (Hulanda), combinando e poemanan di Rosabelle cu e musica di e album nobo di van Camp. “Ta un honor pa wordo invita na un evento cu ta celebra literatura den tur forma. Mi ta regresa Aruba cu un curason hopi contento y un alma cu hopi energia,” Illes a comparti. Pa mas informacion tocante Rosabelle su trabou por bishita su pagina web: www.rosabelleilles.com
