Castigo di 2 aña di prison pa homber y muher cu a viola un dama
ORANJESTAD – E homber V. y e dama C. a presenta den Corte pa scucha nan sentencia den e caso penal cu Ministerio publico a cuminsa contra nan. Ambos ta wordo haya culpabel di a viola e dama R.
SOLO DI PUEBLO por a compronde cu Hues ta haya V. y C. complice di a viola e dama R., den e apartamento di C.
VIOLA DAMA
Hues den su sentencia ta mustra cu e victima R., ta amiga di e dama C. Riba 18 di Maart 2024, R. a sali cu un amiga A. y nan a bay na un bar na Surfside. Eynan R. topa cu un otro amiga C. cu tabata cu su amigo V. Den combersacion R. a palabra cu C. y V. cu nan lo topa na un otro bar pa despues sigui trip. R. a hiba su amiga A. cas, algo despues di 12’or di anochi.
R. a bay topa cu e pareha C. y V. Nan a bay na un bar na Noord y despues di eynan, C. a propone na R. pa R. hiba su auto cas y nan tres lo sigui trip hunto. R. a compronde cu despues di e trip, C. y V. lo hib’e cas. El a bay di acuerdo y durante e trip na dado momento nan a bay na e apartamento di C. na Meiveld. Na e apartamento, C. y V. a bisa cu nan ta bay den camber. R. a kere cu nan ta bay drumi te mainta y el a bay den camber pa drumi.
R. a bay drumi riba cama y un rato despues C. a drenta den camber y a bay drumi banda R. y a cuminsa caricia y tene relacion cu R. R. tabata bao influencia y no tabata sa con pa reacciona. C. a sigui y na dado momento el a yama su amigo V. pa tene relacion sexual cu R. V. a drenta den camber y a bay kita paña di R. E momento ey R. a reacciona cu no. E no kier tin relacion sexual. Pero asina mes V. a kita tur su paña y a cuminsa tene relacion sexual cu R. R. a cuminsa yora y bisa cu e tin hopi dolor. C. no tabata worry y tabata insisti pa V. sigui. R. tabata sigui yora y bisa cu e tin dolor. Na dado momento V. a stop. R., na yoramento a coy su pañanan y a coy su cellular pa yama su amigo G., pa bin busk’e. Ora cu e tabata papiando cu G., C. a kita e cellular y a papia cu G. y despues a pasa R. e cellular cu tabata paga. R. a sali for di e apartamento na yoramento. El a keda yama G. pa yud’e pero e bateria di e cellular a baha.
POLIS TA MIRA VICTIMA BANDA DI CAMINDA
Un agente di Polis, cu tabata coriendo den su auto mas o menos 5.30 di mainta, a mira un dama sinta banda di caminda ta yora. El a para pa mira kico tabata pasando. E dama a resulta di ta R. E ora ey R. a conta tur cos y e agente di Polis a dicidi di hiba R. hospital y R. a haci denuncia.
INTEROGA DOS TESTIGO
Ta asina cu e amiga di R., e dama A. a wordo interoga como testigo. El a confirma cu e tabata cu R. e anochi ey y R. a hib’e cas pa sigui bay sali cu e amiga di R., C. El a bisa Polis cu R. den careda di 4’or di madruga tabata mand’e whatsapp y bis’e cu nan tabata force. A. a bisa cu R. a hasta mand’e “location” pa A. bay busk’e. A. a bisa cu R. a yam’e na yoramento y na dado momento comunicacion a kibra y R. no a yama mas.
E amigo di R., e homber G., tambe a wordo interoga como testigo y el a bisa cu 4.57 di mainta riba 19 Maart 2024 el a haya 5 miss call di R. El a manda varios whatsapp caminda R. ta pidi pa bay busk’e pasobra nan kier forc’e. G. a puntra kende kier forc’e y R. a bisa cu e dama C. kier forc’e y cu nan kier tin relacion sexual cun’e. G. a yama R. pero C. a coy e cellular y no tabata kier pasa R. e cellular.
FISCAL A EXIGI 3 AÑA Y 6 LUNA DI PRISON
Fiscal ta haya e pareha V. y C. culpabel di complice di violacion di e dama R. Fiscal a sigui bisa cu e pareha a abusa di R., kende tabata bou influencia y no tabata por a reacciona y resisti. Tambe Fiscal ta haya cu V. y C. a haci actonan inmoral cu R. Fiscal a exigi pa aproba e demanda di daño material exigi pa abogado di R. pa mas di 7 mil florin cu ta inclui, gastonan di e abogado. Tambe Fiscal a exigi pa aproba e demanda di daño inmaterial di 10 mil florin.
EVALUACION DI HUES
Ta asina cu e acusadonan V. y C. a nenga di a forza R. tin relacion sexual. Nan ta bisa cu nan tabata vrij cu R. Segun e pareha, ora cu kier a tene relacion sexual R., el a bisa no y nan a stop. Hues a bisa cu e no ta kere e pareha su declaracion. El a mustra cu V. ta nenga di tabatin relacion sexual cu R., siendo cu a haya DNA di V. den e parti intimo di R.
Hues ta haya V. y C. culpabel di a viola e dama R. Hues ta haya cu aki a tacha e integridad di R.
Hues no ta comparti e acusacion di Fiscal cu e victima tabata den un estado cu e no por a reacciona y resisti contra e violacion. Hues ta declara V. y C. liber di e parti di e acusacion aki.
CASTIGO
Hues a condena V. y C. na 2 aña di prison. Pa cu e demandanan di daño, Hues a rechaza e demanda di daño material pasobra e ta complica. E parti di daño inmaterial, Hues a aproba 5 mil florin. Hues a bisa cu e victima por cuminda caso civil contra V. y C. pa haya e daño cu el a pidi. Hues a impone e medida di pago.
