Nos tur sa cu den e bida aki, ta dos caminda tin , un caminda bon, y un caminda malo,
Hopi biaha nos kier purba cana den dos caminda, un rato den e caminda bon, y despues un rato den e caminda malo.
Pero e sistema di bida ey no ta cumbini ningun hende,un hende mester dicidi pa su mes, den cual caminda e ta cana, pasobra depende bo bida aki na tera cu Senjor,pa mayan bo por gosa den cielo cu Cristo Hesus.
Palabra di Dios ta sinja nos ken nos ta y con nos tin cu comporta den e caminda di Senjor, pasobra Cristo Hesus a bisa :Ami ta e caminda, e berdad, y e bida, ni un hende por yega serca e Tata, si no ta pa medio di Mi.
E caminda aki ta e caminda di berdad, caminda idolatria no por yuda hende yega mas serca Dios, pasobra Hesus ta identifica su mes, como e caminda berdadero, nos no tin mester di bay ningun caminda, pero bini directamente serca dje.
Hesus a bisa: Bin serca Mi tur cu ta cansa y carga y lo Mi duna boso sosiego( Mateo 11:28), pasobra ta solamente serca Hesus nos por hanja sosiego berdadero.
Pasobra nos ta e obra di Su man, crea den Cristo Hesus pa bon obranan, cualnan Dios a prepara,di antemano, pa nos cana den nan. Efesionan 2:10)
Pesey mescos cu boso a ricibi Cristo Hesus e Senjor, asina cana den dj’E, siendo firmemente araiga, y awor edifica den dj’E y stableci den boso fe,mescos cu boso a wordo instrui, y ta abunda den gradicimento.( Colosensenan 2:6-7).
Un hende cu ta bisa cu e ta un Cristian , mester sa cu Cristo Hesus ta e prioridad di su bida, mester sa cu e senjalnan ta sigi esnan cu ta kere, y cu e mes no tin nada di agrega den su bida, pasobra Crsito Hesus ta tur cos pa nos.
E palabra di Dios ta bisa; Si boso a lanta cu Cristo anto,sigi busca e cosnan di ariba, caminda Cristo ta sinta na man drechi di Dios.Pone boso mente riba e cosnan di ariba, no riba e cosnan cu ta riba tera.( Colosensenan 3:1-2).
No stima mundo ni e cosnan cu tin den mundo. Si un hende ta stima mundo, e amor di e Tata no ta den dje.
Pasobra tur loke cu tin den mundo, e deseo di carni, y e deseo di wowo, y e orguyo di bida,no ta bini di e Tata, sino di e mundo.
Y e mundo ta pasa bay cu su deseonan tambe, ma esun cu haci e boluntad di Dios ta permanece pa semper.( 1 Juan 2:15-17).
Pesey Galationan 5:16-25 ta splica nos pa cana segun e Spirito y boso lo no cumpli cu deseo di e carni.Pasobra esnan cu ta practica e obranan di carni lo no hereda e reino di Dios.
Pesey mira con boso ta cana, no manera hende bobo, manera hende sabi.Haciendo bon uso di boso tempo, pasobra e dianan ta malo.( Efesionan 5:15-16).
No sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon,y agradabel y perfecto boluntad di Dios.(Romanonan 12:2).
Nos tin haci tur esfuerso pa nos yuinan cana den e caminda di Cristo Hesus, pasobra malicia di mundo y inmoralidad, y idolatria ta buscando nan pa destrui.
Ta tempo pa habri wowo y hala serca Dios, pasobra e ladron a bini solamente pa horta pa mata y pa destrui. Sinceramente, Pastor Marcel Balootje
