Tin un gran mentira ta bay rond pa hopi tempo tempo caba, cu hopi hende a cay aden of ta cayendo aden pa falta di conocemento.
Scuchando combersacion di hende tur caminda bo tende lo siguiente:
Tal persona no ta drecha mas.
E persona ey nos ta bira bon mas.
Esey ta asina e a nace e no por drecha.
Fulan ta keda un adicto e no ta drecha.
E no por stop di bebe, ta for di chikito e a cuminsa.
E famia ey tur ta divorcia, pasobra nan ta hende cabes habri.
E homber ey ta un adultero, pasobra nan no por biba fiel cu nan esposa, e cos ey ta den su sanger.
E mucha ey a nace homosexual of lesbiana e no por cambia.
E tipo ey ta un criminal,abusador pa semper di su bida.
E muher ey semper ta gusta homber di otro hende, ta un famia bruha.
Ta tur hende den e famia ey ta sufri di mesun malesa.
Ta su mama e sali, nan tur tin hopi yiu cu diferente homber.
E ta gusta biba den pica, inmoralidad, abominacion y su orguyo tin e mal mara.
Tur e cosnan aki ta gran mentira, diabolico, satanico cu hende ta kere, pasobra Dios ta Todopoderoso y e por cambia bida di tur esnan cu tin deseo pa cambia.
Tur hende cu kier un cambio den nan bida, no ta importa con sushi y desastroso e bida por ta, si e persona ta desea, e persona tuma un decision y ta determina cu e kier cambia, Cristo Hesus ta fiel y husto di cambia su bida.
No laga ningun diabel of hende gaña bo y asina keda biba den eror, inmoralidad, abominacion,violencia, adulterio, y tur otro cos cu no ta agrada Dios, mientras tin salida pa bo den Cristo Hesus.
Tin hopi hende cu a cana hopi aña bao di tratamento, na man di dokter, psicologo, tuma masha terapia, y hopi biaha scuha for di boca di hende cu no tin cambio pa nan, pero ora nan a bini na Cristo Hesus nan bida a cambia completamente.
Hende no mester lubida cu Cristo Hesus ta e unico cu por bisa:
* Bin serca Mi tur cu ta cansa y carga,y lo Mi duna boso sosiego.( Mateo 11:28).
Locual Cristo por ofrece ningun hende, ni religion, ningun tipo di meditacion mundano no por ofrece, pasobra locual Cristo ta ofrece ta bini directamenta di ariba for di nos Tata cu ta den cielo.
Su palabra ta bisa bon cla: Si nos confesa nos pica, e ta fiel y husto di pordona nos, nos pica y libra nos di tur inhusticia ( 1 Juan 1:9). Arepentimento y Confesion ta limpia mente, consenshi y curason,cual ta e base pa un bon salud mental.
*Efesionan 4:22-24 ta para scirbi: Pa encuanto boso manera di biba di antes, boso pone un banda e hende bieu,cu ta wordo corumpi conforme e pasion engañoso, pa boso wordo renoba den e spirito di boso mente. Y pa boso bisti e hende nobo, cu a wordo crea segun Dios den husticia y santidad berdadero.
*Mira pa ningun hende no cohe boso preso door di filosofia, y engaño bano, segun tradicion di hende, segun e principionan elemental di mundo, y no segun Cristo.( Colosensenan 2:8).
*Ma bisti boso cu Señor Hesus Cristo y no haci provision pa e carni, pa cumpli cu su mal deseonan.( Romanonan 13;14).
Tur hende cu tin deseo di cambia nan bida , por haci esey pa medio di Cristo Hesus.
Sinceramente, Pastor Marcel Balootje.
