En coneccion cu siman di conscientisacion di salo awe 14 te cu dia 20 di maart Departamento di Salud Publico y IBISA ta pone enfoke riba e importancia di pone un control saludabel den e consumo di salo pa preveni problemanan cu nos salud fysico. E siman aki nos tin e tema di “Sacudi e habito di Salo”.
Pa un bida saludabel nos kier enfoca riba preveni e consumo halto di salo den nos dia diario. E consumo halto tur dia por causa diferente problema pa nos salud y ta pone nos na riesgo di:
• Presion halto,
• Ataca di curason,
• Enfermedad na nos riñon,
• Y otro enfermedad nan cardiovascular.
E salud di nos comunidad ta hopi importante y pa es motibo aki nos seccion promocion di salud ta comparti e hermentnan pa desaroya y implementa cambio den nos habito pa cu salo.
Punto nan cu por aplica ora di consumi salo ta:
• Limita e tipo di snacks den cas cu ta contene salo, por ehempel chips cu ta contene salo.
• Ora di hasi compras, lesa e contenido di salo y tuma nota e suma di sodium den e produkto. Den e lista di contenido por wak e percentage cu un persona por consumi den un dia, e percentage mesters ta abou.
• Sea alerta ora di come afo di cas, tuma nota pa e opcion nan di plato tin minimo salo. Y si ta contene salo caba, no agrega mas den esaki.
• Ora di cushina, hasi uzo di produkto nan mas fresco posibel. Por ehempel uzo di celery, parsley of basil den nos cuminda.
• Hasi uzo di ingredientenan cu ta contene un minimo di salo of niun salo ora di prepara nos dushi sabor den cuminda. Por ehempel curry, turmeric of garlic.
E siman aki e campaña ta netamente e comienso di hopi mas cu Departamento di Salud Publico lo bai traha conhunto cu IBISA y otro organisacionnan durante e aña aki.
Tur colaboracion ta pa duna e comunidad di Aruba mas informacion y instruccion di con pa trece cambio saludabel den nan habito y tambe pa tin un mihor calidad di bida pa full famia.
Pa mas informacion por sigui e pagina di Facebook di Directie Volksgezondheid DVG Aruba of yama riba 522-4200.
