E siman prome cu su presentacion den Parlamento tabata un periodo intensivo pa Minister Wever y e delegacion di Aruba, kendenan a bishita Washington D.C. pa un serie di reunionnan importante. E encuentronan aki a tuma luga cu dos di e institucionnan financiero mas prestigioso di mundo: e Fondo Monetario Internacional (IMF) y e Banco Mundial. E agenda tabata enfoca riba e situacion economico global y regional, y specificamente riba e implicacionnan pa un economia chikito y dependiente manera esun di Aruba.
Durante e reunionnan, e delegacion di Aruba a drenta den un dialogo constructivo cu representantenan di e institucionnan aki. Nan a discuti e pronosticonan economico, e posibel riesgonan y e strategianan cu Aruba ta considerando pa mantene stabilidad financiero. Tambe tabatin encuentronan cu banconan comercial cu ta presta placa na Aruba, unda a scucha nan perspectiva riba e desaroyonan di mercado Mericano y nan vision riba e futuro economico. E siman di reunionnan aki tabata un oportunidad valioso pa Aruba pa intercambia di idea, busca conseho y fortifica su relacionnan cu e actornan financiero internacional clave.
