SIMAR precupa! Maestronan ta sigui sin aumento: un proceso cu Endy a inicia, pero Gerlin a stop

ORANJESTAD – Na vispera di ciere di un otro aña escolar, maestronan ta keda sin aumento salarial.

Sindicato di Maestronan di Aruba (SIMAR) a expresa su disgusto y tristeza pa e situacion di salario di e sector di enseñanza. Den un comunicado diamars atardi, SIMAR a recorda, cu mientras tin un dicho na papiamento ta bisa “penado no ta pena pa largo”, pa e maestro di Aruba esaki no ta conta.

SIMAR a indica cu e ultimo aumento real pa maestro tabata na aña 1990, mas di 34 aña pasa. Durante tur esey, maestronan a pasa tur tipo di restructuracion y evaluacion, pero salario no a cambia.

Un proceso avanza cu Gerlien a stop

Loke hopi no ta sa, pero SIMAR mes ta testigo, ta cu durante e gobierno anterior, ex-minister Endy Croes tabata den un proceso avanza pa aumenta salario di maestronan. Segun fuente interno, SIMAR tabata participe y conoce e trabou cu tabata wordo haci pa yega na un solucion husto pa enseñanza.

Pero, cu e cambio di gobierno, y entrada di Gerlín Croes di partido Futuro como minister di Enseñansa, e proceso aki a wordo gestop. Gerlin a dicidi pa para tur cos y cuminsa di nobo.

Esaki ta significa cu maestronan a keda atras un biaha mas, mientras costo di bida ta subi cada luna y hopi maestro ta yega pension sin un salario digno.

Desilusion riba vispera di vacantie

SIMAR ta warda un invitacion formal di e minister pa sigui cu e proceso di restructuracion salarial. Pero te awor, e gobierno di AVP y Futuro no a duna ningun señal concreto, y maestronan ta bai den nan vakantie mereci cu un gran preocupacion riba nan situacion financiero.

Na final di su mensahe, SIMAR a desea tur maestro un “dushi vakantie”. Pero e realidad tras di es palabra ta duro: no tin nada dushi na un vakantie, si bo ta bai sin un salario digno despues di un aña di trabou duro y sin speranza cla pa un futuro mihor.