Lo ta bon pa cuminsa plania kico pa bay planta. No lubida si cu tin mester di awa pa planta sea un simiya of un mata. Consehabel ta pa planta den escala chikito prome. Tira un bista den bo cushina kico ta e berduranan cu mas ta wordo uza diariamente y mira si tin posiblidad pa por planta esakinan pabo propio uzo. Por uza pochi, of si tin baki di mata of mira cua ta e otro metodonan pa por planta y mira si esakinan ta alcansabel pabo. No lubida cu santa Rosa ta disponi di gordura cu nos mes ta produci. Purba na colecta awa ya cu awasero ta yobe un poco den e dianan aki cu kisas bo por probecha. Tur esaki ta yuda na spaar poco e awa y asina bo no haya un recibo di awa astronomico fin di luna. Kisas pa esnan cu tin terenonan mas grandi tambe por cuminsa prepara nan tereno pa por bai cuminsa planta. Departamento di Agricultura, Cria y Pesca Santa Rosa tey tambe pa duna tur conseho y yudabo pabo por tin un cosecha exitoso.
Recientemente Departamento di Agricultura, Cria y Pesca Santa Rosa a ricibi diferente tipo di simiya. Nos ta papiando aki di un cargacion di simiya bastante varia y amplio y di bon calidad. Nos ta papiando aki di diferente simiya di fruta y berdura popular y mas gusta y cu logicamente ta nase y crese sin problema den nos clima.
Nos tin entre otro diferente tipo di simiya di Patia, diferente tipo di simiya di Tomati, Melon, Yambo, Comcomber di salada, Promenton y asina por sigui menciona. Tur esaki ta pa abo cu tin e gana di cuminsa of simplemente bo kier continua cultivando productonan fresco y saludabel.
Nos ta invitabo pa pasa tira un bista riba nos surtido amplio di simiya y scohe esun dibo preferencia pa sina bo por planta.
Nos orario ta for dialuna pa diabierna di 7’or di mainta te cu 3’or di atardi. Caha ta sera 2:30 di atardi. Pa mas informacion por tuma contacto cu nos na tel; 585-8102 pa cualkier pregunta.
