Mas nos somete na Dios, mas nos resisti e diabel, mas forsa y sabiduria,nos tin pa para firme contra e scuridad cu ta aumentando, rond di mundo, pasobra e palabra di Dios ta siña nos, cu no ta cu forsa ni cu poder pero pa medio di Su Spirito.
Forsa fisico nos ta ricibi, door di come na ora, y come saludabel, haci ehercicio, pa asina nos sanger circula bon, y nos ta evita di bira malo.
Pero ora nos ta papia di crecemento spiritual, nos mester busca serca Señor, pasobra ta Señor ta esun cu por duna nos crecemento spiritual y e ta yega na nos door di humildad y obediencia.
Pasobra ta e Spirito di Dios ta esun cu ta duna bida, e ta duna sabiduria, den nos mes carni nos no por crece, pero lesando, meditando,y creyendo den e palabra di Dios ta e base pa nos crecemento.
Den 1 Pedro 2:1-3: E palabra di Dios ta recorda nos pa pone un banda tur locual ta hipocrecia, malicia, envidia,calumnia y tur engaño, y mescos cu yuinan recien naci,anhela na e lechi puro di e palabra,asina cu pa medio di dje, boso por crece den salbacion, si boso a purba e cariñoso di Dios.
Laga nos no lubida cu Hesus a humiya su mes y Dios a hals’E. ( Filipensenan 2:8).
Den tur su sufrimento Hesus a scohe pa humildad y obediencia.
Pa demostra na nos e caminda di crecemento spiritual, pasobra hayando su mes den condicion di hende aunke e tabata existi den forma di Dios, E no a considera,Su mes den igualdad cu Dios,ma E a bandona Su mes gloria, tumando forma di un sirbido, siendo traha den semehansa di hende, y hañando Su mes den condicion di hende.
E a humiya su mes,door di bira obedecido,te na morto, hasta morto na un crus.
Pa tur esnan cu ta kere den Dios, humildad y obediencia na Dios, mester ta nos forma di biba (lifestyle), pasobra asina Dios por usa nos pa Su Honra Y gloria, den humildad y obediencia, nos ta demostra cu nos a nenga nos mes pa sirbi Dios.
E palabra di Dios ta siña nos: Tempo cu E tabata den carni, E tabata ofrece oracion y suplica cu gran sclamacion y lagrima na Esun cu ta capas pa salb’E for di morto, y E a wordo tendi pa medio di Su piedad. Aunke cu E tabata Yiu, E a siña obediencia,door di e cosnan cu E a sufri. Y despues di a wordo haci perfecto, E a bira pa tur esnan cu a obedec’E e autor di salbacion eterno.( Hebreonan 5: 7-9.
Fihando nos wowo riba Hesus, e autor y cumplido di mnos Fe, pa motibo di e goso, pone Su dilanti, a soporta e sufrimento di crus, sin haci caso di berguensa, y a sinta na man drechi di e trono di Dios.(Hebreonan 12:2-3).
Pesey ora nos ta pasa den pruebanan , nos tin di considera Esun cu a soporta tal hostilidad di e pecadornan contra Su mes, pa nos no cansa y perde animo.
Pa e motibo aki e Tata a stima Mi,pasobra Mi ta duna Mi bida,pa Mi bolbe tume , Ni un hende no ta kite for di Mi,ma di Mi mes, Mi ta entrege. Mi tin autoridad pa dune, y mi tin autoridad pa bolbe tum’e. E mandamento aki mi a ricibi di mi Tata.
Aki nos por mira te con leu humildad y obediencia na Dios por yega den bida di Hesus..
Sinceramemte Pastor Marcel Balootje
