Ya pa hoooopi hooopi aña caba Tio Ali, kende ta biba na Corsou, ta subi avion pa e por haci e muchanan di Aruba contento. Tio Ali ta participa tur aña na Aruba su Festival di Buki pa Mucha. Tur aña e muchanan/scolnan ta keda pidi pa Tio Ali. Y biblioteca ta cumpli. Asina ta, cu Tio Ali ta un ‘repeat guest’. Tio Ali ta trece un presentacion musical y ta pone muchanan canta, rima y baila.
Tio Ali ta e nomber di e personahe cu Alvin Inecia a crea. Tio Ali a lanta den un tempo cu no tabatin television anto tur hende tabata conta cuenta. Y asina e ta gusta.
Tio Ali e aña aki ta celebra su di 30 aniversario como contado di cuenta y lo celebra esaki cu e muchanan di Aruba tambe. Tio Ali ta conta: “Danki na Richard Hooi ku a trese Poesia Rítmiko kompañá ku instrumentunan rítmiko na Kòrsou, Aruba, Boneiru, mi a diskubrí un forma di arte ku mi tambe kier a realisá. Komo miembro di Grupo Orkesta Kultural mi tabata partisipá den e disiplina di Baile Folkloriko, Komedia, Kanto i tokamentu di Tambú. Poesia Rítmiko tambe a bira parti di e programashon di Grupo Orkesta Kultural. E lema di Tio Ali ta: “Entretené pa Eduká.” y Tio Ali a bira un Sirbidó di Edukashon ku a hasi Alvin Inecia reseptor di hopi rekonosimentu. Manera e rekonosimentu ku aña tras aña Tio Ali ta risibí di Biblioteca Nacional Aruba, na nòmber di skol, dosente i prinsipalmente muchanan di Aruba, huntu ku aseptashon di koleganan outor di Aruba. Masha masha danki pa e rekonosimentu ei pa e trabou di Alvin Inecia komo Tio Ali, kual mi ta keda hasí ku puresa i hopi amor. “
Den e siman di dia 4 pa 8 di november hopi autor tanto di Aruba como for di, Boneiro, Corsou, Sint Maarten, Sint Eustatius y Hulanda ta bishita scol pa conta storia den klas y na biblioteca. Diferente ilustrador ta duna presentacion ta con nan ta ilustra storia pa mucha.
Un grupo grandi di escritor di buki pa mucha ta bishita mas cu 50 scol. Di Aruba esakinan ta: Liliana Erasmus, Vanessa Paulina, Irmgard Frans, Emerita Emerencia, Ariana Koolman-Chirino, Gino Vrolijk y Robert Reeberg. For di Boneiro biblioteca ta presenta: Segni Bernadina. Di Corsou ta yama bon bini na Tio Ali, Mercee Doran y Crisen Schorea. For di Hulanda ta bini: Danielle Schothorst, Maria Karg y Sanne Rooseboom. Misha Spanner (Contado di cuenta) ta participa pa di dos biaha na e festival na Aruba y ta bini for di St. Eustatius. For di St. Maarten ta presenta Ralph Cantave. E grupo aki ta bishita scol pa conta storia, papia tocante buki cu mucha y tambe ta stimula mucha pa lesa mas.
