Un di e problemanan cu nos hubentud tin,pa falta di conocemento ta cu nan no ta balora nan mes , tampoco respeta nan mes.
Tin hopi probechador den e sistema di e mundo aki, y ora un hende no sa nan balor nan ta cay facilmente den e trampa di e malbado.
Droga ta un probechador, alcohol ta un probechador,paranda ta un probechador, una bes bo ta den bo no tin control, y pasobra bo no tin control e cos ta probecha di bo.
Nos hubentud tambe a wordo traha den e imagen y semehansa di Dios. Nan tambe ta creacion di Dios, nan tambe mester wordo balora y respeta.
Ta esey ta un parti di educacion cu e mayor mester duna na su yiu, pasobra plan di diabel ta pa tur locual cu ta di Dios mustra sin balor.
Den e buki di Oseas 4:6 ta bisa: Mi pueblo ta wordo destrui pa falta di conocemento.
Awendia bo ta tende hopi caminda cu e muchanan di awor sa tur cos, y esey no ta berdad, pasobra si nan tabata e esey, lo no tin tanto mucha asina den problema, lo no tin tanto mucha asina den prison.
Mayoria hoben cu ta den problema ta pa e motibo, cu nan no ta balora nan mes, nan no ta respeta nan mes, y pesey nan no tin ningun proposito pa futuro.
Hopi ta wak comportacion di hende grandi especialmente esnan di liderazgo y kier imita, pero ora esnan cu ta den liderazgo ta haci cosnan robes, y no ta duna bon testimonio, especialmente ora nan mayor ta haci cosnan cu ta trece dolor riba curason di nan propio yiu, e programma di e hoben ta danja.
Hobennan ta bisa cu si cierto lider den comunidad ta haci cos robes, y nada no ta pasa,
pakico e ta wordo sera, ora e haci algo chikito, asina nan ta compara y balora nan mes.
Si cierto persona por tin arma, y ningun hende no por hacie nada dicon e si no por tin arma,
Si cierto persona a bende droga y bira rico dicon e si no por, esey ta net e ehempel nan robes cu nan ta mira awendia y kier imita , enbes di sinja balora y respeta nan mes.
E asunto ta hopi mas serio cu nos ta kere, pasobra na un edad hopi chikito, ya caba e mucha ta yama locual ta malo bon y locual ta bon malo.( Isaias 5;20)
E maldad ta persigi e hubentud, y pa falta di conocemento di e palabra di Dios, nan ta cay den trampa di diabel ( Juan 10:10).
Nos muchanan ta bay bon scol, ta ricibi bon ensenjansa , pero pa falta di educacion na cas, y cu nan ta kere mas den internet, y cu nan tin falta di conocemento di e palabra di Dios, nan ta trompica.
Si bo puntra un hoben riba caya cu e ta haci oracion, bo ta haya un contesta negativo, pasobra e hoben no conoce e poder di oracion , pesey ora e hanje den cualkier problema e no ta bay na e trono di gracia di Dios, pero e ta bay serca esnan cu ta bende arma y sembra destruccion.
Of boso no sa cu boso curpa ta tempel di Spirito Santo, kende ta den boso,Kende boso tin di Dios, y cu boso no ta pertenece na boso mes, pasobra boso a wordo cumpra pa un preis,pesey glorifica Dios den boso curpa.
Si nos hubentud tene cuenta cu esey , nan lo evita hopi problema.
Sinceramente , Pastor Marcel Balootje
