Sinceridad ta enemigo di mentira

Bo tabata sa cu e prome pica riba mundo tabata mentira?

Ta cu mentira diabel a papia cu Adam y Eva.

Y awor despues di siglonan, bo por mira cuanto danjo mentira ta haci den famia, cas, matrimonio,y rond mundo, cuanto hende ta ganja, y ta laga nan mes wordo enganja.

Awor mentira a cambia di nomber e a bira “Fake News” pero ta mesun mentira e ta keda, pasobra cada biaha cu e hende papia algo , cu no ta berdad , ta mentira,aunke despues e bisa ta chansa e a haci.

Menntira ta bini completamente for di diabel, for di scuridad, pa pone hende kere algo cu no ta berdad, y pa trece pleito y division, esey ta un di su formanan di horta, mata y destrui. Door di pone mentira den boca y mente di hende.

Lipnan mentiroso ta un abominacion dilanti di Senjor, ma esnan cu ta trata cu fieldad ta Su delicia.(Proverbionan 12:22).

Mentira ta algo masha contagioso, cu ta danja karakter di hende, mentira ta blokia humildad, y integridad, pasobra un bon karakter ta wordo forma cu hulmidad, sinceridad y obediencia, y asina nos ta yega na integridad. Ningun hende por ta integro cu un boca yen di mentira, ningun hende cu bon karakter por ta un mentiroso.

Aunke mundo ta yena cu tur clase di mentira, yuinan di Dios tin cu percura di aparta y aleha for di mentira, pasobra e palabra di Dios ta bisa hopi cla cu un mentiroso lo no hereda e reino di Dios.( Revelacion 21:8).

Cada cos cu hende pretende di ta y no ta , ta un mentira, cada cambio cu un hende purba haci contra e naturalesa den cual Dios a crea e persona, ta un mentira, cada cambio di indentidad contra naturalesa di Dios ta un mentira , y mas tristo cu por ta, mundo ta cambiando leynan pa asina acepta mentira.

Pasobra e sistema di mundo kier domina cu mentira, pa asina purba tapa e berdad di Dios, pero esey nunca lo bay sosode, pasobra berdad semper lo prevalece riba mentira, mentira por ta grandi , pero un simpel palabra chikito di berdad, ta basha e mentira abao.

Un hende husto ta odia mentira,ma un hende malbado,ta actua na un manera repugnante,y bergonsoso.( Poverbionan 13;5).

Proverbionan 6:17 ta bisa cu Dios ta odia un lenga mentiroso, y un cos cu Dios ta odia, mester ta algo cu yuinan di Dios ta huy for di dje.

Esun cu coba un pos lo cay aden,y esun cu bolter un piedra, e piedra lo bira bin bek riba dje. Un lenga mentiroso ta odia esnan cu e ta lastima,y un boca cu ta labia ta obra ruina.( Proverbionan 26:27-28).

Un hende cu ta stima su prohimo dificilmente ta lanta mentira,calumnia y difamacion contra su prohimo, y esey a bira algo normal awendia, caminda hende ta usa mentira pa trapa riba otro, sin tene cuenta e danjo cu nan ta haci sea na famia of matrimonio.

Un testigo falso no ta keda sin castigo,y esun cu ta papia mentira no ta scapa. ( Proverbionan 19:5).

Un hende husto ta odia mentira, ma un hende malbado, ta actua na un manera repugnante y bergonsoso.( Proverbionan 13:5.

Pesey poniendo mentira un banda, cada un di boso papia berdad cu su prohimo,pasobra nos ta miembro di otro.( Efesionan 4:25).

Tur locual Dios a priminti na nos ta berdad, Dios a priminti bida eterna den Su yiu Cristo Hesus y e a cumpli cu nos , Dios no ta cambia , Su palabra ta berdad pa henter nos bida. 

Sinceramente, Pastor Marcel Balootje