No troce, Bisa berdad:
E grupo sindical mes ta causa cu hopi hende no ta tuma nan na serio. Ora cu constantemente nan ta trece mentira dilanti, esey ta afecta nan credibilidad y pesey mes ta saca conclucion cu nan ta wordo opera y dirigi politicamente.
Den un rueda di prensa cu a tuma lugar e siman aki, por scucha nan haci expresionnan mentiroso, cu nan no tin rason. Dicon nan kier keda instiga?
Mas lew nan kier haci comparacion cu Curacao, cual ta basa riba otro mentira.
Nan ta critica gobierno di Aruba cu supuestamente a tuma decision unilateral, y despues ta elogia Curacao, cu aya si a tuma decision hunto cu sindicato.
E ponencia aki tambe ta basa riba mentira, pasobra tur tempo nan a wordo yama pa sinta na mesa, pero ta nan mes a stroba e proceso.
Ta cuanto ves Gobierno no a bay mesa cu nan? Kico nan tabata haci ora nan ta na mesa? Blokia asunto! Bini cu yen cosnan for di sla, pa stroba acuerdo y decision. Nada cu Gobierno tabata trece, nada ta bon. Despues nan a cuminza usa ‘desconfiansa’ como nan hustificacion.
Na December 2021, nan no tabatin berguenza pa laga resalta nan indisponibilidad pa sinta na mesa, ora nan a manda carta, poniendo condicion ridiculo, cu no ta contribui na dialogo, pero na mas division y kiebro.
E carta tey, fecha 1 December 2021, unda nan a mustra INDISPONIBILIDAD. Nan a exigi pa paga bek 12.6 completo, pa despues bay mesa. Que locura!
Mas pior ta cu nan kier a kita mas placa di nan miembronan, dor di rechasa e proposicion di 5%, alegando cu e lo afecta pensioen.
SINDICATONAN KIER A CORTA PAFOR DI SALARIO
E decision di Gobierno pa corta den salario bruto no a conta cu sosten di tur sindicato ya cu e reduccion aki, segun nan, tin consecuencia p’e pensioen di e empleado publico. Pesey nan kier e recorte di e 5% pafor di e salario.
E tepmpo aya Gobierno a splica e sindicatonan cu si bay corta pafor di e salario bruto, esaki lo perhudica e empleado publico mas, ya cu e lo ricibi menos placa den man.
E efecto lo ta un reduccion di 8,6% enbes di 5%, pagando e mesun impuesto y hayando menos den man pa luna. Cu e reduccion di 5% den salario bruto, e peso di impuesto tambe ta baha y e empleado publico ta keda cu un salario netto mas halto compara cu e proposicion di sindicato.
PENSIOEN TA KEDA AFECTA CU APENAS 4 FLORIN
Ora di corta den salario bruto esaki tin consecuencia p’e pensioen di e empleado publico. Gobierno a haci e calculacionnan necesario pa mustra sindicatonan cu e pensioen ta keda afecta cu a penas 4 florin (e suma ta 3,68 florin) pa luna y 44 florin pa aña.
Esaki ta un efecto cu lo sinti te na momento di cobra e pensioen. Pa aworaki e empleado publico ta keda cu mas salario netto.
Cu e proposicion di sindicato, e pensioen ta keda intacto pa dia cu por cobre, pero pa aworaki e empleado publico lo mester wordo corta 8,6% enbes di 5%, kedando cu menos salario netto den cartera, Gobierno a splica na Juni di 2020.
Nan a bin compronde cu e recorte di 5% di salario mes lo cumbeni nan mihor, pasobra e lo no afecta na pension manera nan a pretende.
Pues awe nan no por bin alega riba decision unilateral, etc. etc. Tabata un momento extra ordinario y no tabatin tempo pa tranca decision, pasobra si Hulanda no a manda placa dia 20 di Mei 2020, nan lo a cobra 0.00 florin dia 24 di Mei 2020.
Pues, nan tabata di mala fe y tabata haci wega di politiek y kaki sconde.
Ta haci un yamada na nan consenshi, y na nan ser, pa busca pas! Busca dialogo berdadero. Mustra disponibilidad. Debati cu prueba y cu argrumento. Gritonan di instigacion ta nada otro cu wega politico. No ripiti e lucha a base di mala fe, asabienda cu nos tabata den pandemia y nos tabata den man di Hulanda. No exigi loke bo sa di antemano cu ta imposibel!
Awor cu Gobierno a paga sin aprobacion di Hulanda, pa mustra su compromiso cu empleadonan publico, parce tampoco sindicato kier compronde.
