17 december ta den porta!
Sin dialogo y acuerdo, no por confronta Hulanda
Segun Prome minister di Aruba a bisa diaranson merdia cu sindicatonan ta perdiendo tempo y tempo ta cabando. Dia 17 di December proximo lo tin un reunion di conseho di reino na Hulanda, unda Hulanda lo mester trata e posicion di Gobierno hunto cu sindicatonan pa termina of ahusta e recorte.
Sindicatonan te ainda no por compronde, cu e accion of welga, ta perdemento di tempo, pasobra nan mes ta tene porta habri pa asina Hulanda por tuma su mes desicion.
Ta lamentabel cu nan ta perde asina hopi tempo, enbes di tuma e oportunidad di bay den dialogo, haci tur pregunta, haya tur contesta, enbes di keda basa nan mes riba ponencianan chupa for di nan duim.
SOLO DI PUEBLO tampoco ta compronde e motivacion di sindicatonan di bay den welga, enbes di strategia un mihor manera pa aserca Hulanda.
Cada ves por tuma nota cu sindicatonan ta papia cosnan for di sla, cosnan cu no ta basa riba berdad, informacionan incorecto.
Por ehempel, sindicatonan ta bisa cu no ta tur compania di gobierno a recorta salario. Esey ta mentira, pasobra tur compania di gobierno a recorta salario. E diferencia ta cu no ta tur compania a entrega na FASE, pero pa esey tambe tin splicacion cu un compania cu no tin, no por entrega. Esaki ta nifica cu e compania tin falta di likides.
Pues, ta spera cu e sindicatonan por haya conciensa di loke nan ta hasiendo, esta cu menasa gobierno pa kita 12.6, lo no ta algo cu nan lo logra, pasobra gobierno tin e deber di garantisa nan tur nan salario. Si bay kita 12.6, lo bay termina cu gobierno no lo haya placa fia y consequentemente no por paga salario. Tesey sindicatonan kier?
