Ta parce cu Gobierno como representante di Pais Aruba como Dunado di Trabou no ta caba di compronde kico kiermen Respet y kico kiermen biba riba un pais Democratico.
Na mei 2020, Gobierno ta hinca man den cartera di e trahadonan y ta ranca 12.6% di nan entrada pero tambe ta kita 12.6% di e cuminda for di hogarnan di un cantidad grandi di trahado. Cu e 12.6% gobierno a negocia y balora loke segun gobierno ta kere cu e trahado di gobierno merece pa biba.
A impone y mishi cu e salario di trahado, actonan cu ta contra ley contra nos Democracia y esaki ta nifica tambe un preludio di Dictadura.
Un grupo grandi di diesun (11) sindicato y dos (2) organisacion despues di a tuma nota cu:
– placa di empleadonan publico,
– placa di trahado di companianan estatal y
– placa di fundacion
no ta bay destina mas como parti di solidaridad na e grupo di trahadonan cu a perde trabou of pa yuda mantene cupo di trabou di algun, den unidad nos a informa Gobierno pa para inmediatamente e recorte di 12.6% for di entrada di tur e trahadonan cu ta sacrifica.
Gobierno a propone un comision y ta papia pa ‘hunto’ bay negosha cu Hulanda. Proposicion cu a keda rechasa pa e sindicatonan. Den e ultimo 3 dianan cu a transcuri, e trahadonan cu a sacrifica a sali for di diferente luga di trabou pa demostra nan malcontento, cu Gobierno kier sigui retene 12.6% di nan entrada y di e forma aki sostene e posicion tuma pa e diesun (11) sindicato y dos (2) organisacion.
Nos ta accentua cu nos no ta contra dialogo y ta keda dispuesto semper pa hunto sinta na mesa y yega na un acuerdo. Pero pa esaki sosode mester tene cuenta cu e condicionnan cu nos a pone anteriormente, esta;
– revoca inmediatamente e 12.6%,
– reinstitui inmediatamente e gelijkbedrag di pensionadonan,
– despues cu esaki keda efectua, e sindicatonan ta inicia e proceso di dialogo y negociacion manera proponi door di Pais Aruba.
Nos ta rechasa categoricamente, e menasa di Gobierno, esta cu si nos como sindicato (mester compronde akinan e cantidad grandi di e trahadonan cu ta demostrando nan malcontento), no kier sinta den e comision, Gobierno lo continua cu sindicatonan cu si ta accepta e proposicion di Gobierno.
Ta den ki Democracia nos ta bibando? Cu esaki Gobierno simplemente kier bisa cu e ta propone algo y cu nos ta obliga pa accepta!
Pa medio di esaki, nos ta exigi Gobierno pa:
– stop inmediatamente cu e dialogo cu e sindicatonan minoritario cualnan ta tumando luga riba e tema aki,
– ademas ta urgi Gobierno pa reconsidera su posicion pa cu e eliminacion di e 12.6% di recorte di salario,
– y confirma esaki na nos no mas tarda diabierna 10 december 2021, pa 12’or di merdia pa di e forma aki
Evita escalacion di accion.
