E Sindrome di Tarzan ta wordo describi un patrochi emocional caminda cu e personanan, pa miedo di soledad, ta busca rapidamente relacion nobo sin tuma e tempo necesario pa sana despues di un ruptura. E ciclo aki ta perpetua relacion superficial y dependiente, impulsa p’e necesidad di validacion y e temor na abandono. A traves di ehempel manera esun di Marta, Diego, Laura y Alejandro, por observa con e comportacion aki, aunke no reconoci clinicamente, ta afecta hopi persona den nan buskeda constante di afecto, creando un dinamica emocional insostenibel y repetitivo.
E “Sindrome di Tarzan” ta wordo uza pa describi esunnan, despues di un ruptura amoroso, no ta permiti procesa e duelo emocional ni siña di e experiencia. Como resultado, nan ta bula pa un relacion nobo en busca di consuelo inmediato, di forma similar na con Tarzan ta pasa di un liana pa otro sin por mishi tera. E conducta aki ta un forma di evita enfrenta soledad, dolor of e sensacion di bashi, loke a largo plazo ta genera relacion insatisfactorio y patronchi repititivo di dependencia emocional.
Marta, por ehempel, ta un muhe cu ta idealisa su parehanan, pero ora cu e realidad no ta cumpli cu su expectativanan, su relacionnan ta fracasa y e ciclo ta ripiti. Aunke su relacionnan inicial parce ta prometedor, semper nan ta caba di e mesun manera pasobra Marta no ta tuma tempo pa reflexiona ni sana prome cu cuminsa cu un vinculo nobo. Diego, di un otro banda, tin dos decada sin ta soltero pa mas di algun luna. Despues di cada ruptura, rapidamente ta cuminsa cu otro relacion, sin permiti conoce profundamente nan parehanan. E ta busca pa evita e bashi emocional sin para pensa den su propio necesidadnan.
Laura y Alejandro tambe ta mustra e patronchi aki. Laura tabatin cinco relacion den tres aña. Despues di cada ruptura, e ta sinti su mes kibra, pero pero e no ta tarda pa involucra su mes cu otro persona. Su buskeda constante di validacion externo ta push’e na confundi intensidad inicial cu amor, loke inevitablemente ta lag’e emocionalmente insatisfecho. Alejandro, despues di a sali for di un relacion toxico, rapidamente ta involucra den otro similar, ripitiendo e mesun erornan pa no tuma tempo pa enfrenta su dolor emocional.
E patronchi aki, aunke no ta reconoci oficialmente como un trastorno den manual manera DSM-5, ta comun den e psicologia popular pa describi hende cu no ta enfrenta nan miedo na soledad. E miedo na abandono y e necesidad di validacion constante ta forsa motriz tras di e sindrome aki, loke ta impedi cu e personanan aki establece relacion profundo y saludabel.
Supera e “Sindrome di Tarzan” ta rekeri un gran dosis di introspeccion y tempo pa sana emocionalmente prome cu cuminsa un relacion nobo. Ta fundamental siña disfruta di compania propio y desaroya un autoestima solido. Solamente asina ta posibel kibra e ciclo di dependencia emocional y establece relacion mas autentico y satisfactorio.
Finalmente, e sindrome aki ta refleha e lucha interno pa evita soledad y e bashi emocional. E personanan cu ta experimenta nan sa idealisa nan relacionnan na principio pero sin un reflexion adecua ni un proceso di duelo, e mesun heridanan emocional ta bin bek den cada relacion nobo. Siña ta so, procesa e dolor y priorisa e autoconocemento ta clave pa kibra cu e ciclo aki y haya e balans emocional necesario pa relacion saludabel a largo plaso.
