Bendiciona ta e hende cu no ta cana den conseho di malbadonan, ni ta para den caminda di pecadornan, Ni ta sinta riba stoel di bofonado.
Ma su delicia ta den e ley di Senjor, y den e ley e ta medita di dia y anochi.E lo ta manera un palo planta, canto di coridanan di awa,cu ta duna fruta na su tempo. Y su blachi no ta marchita, y tur loke e ta haci e ta prospera.( Salmo 1:1-3).
Aki nos por mira e beneficonan di hende cu ta sirbi Senjor cu un curason sincero, y cu no ta haci bofon di Dios, pasobra tur properidad cu hende mester den nan bida ta bini di Dios.
Hende no mester haci nada den cual nan ta demostra cu nan ta haci bofon di Dios,
Hende mester evita di tin un bida dobbel,
Hende mester somete na mes na Dios tur momento, no temporalmente,
Hende mester para pa e berdad, y no troce e palabra di Dios,
Hende mester papia berdad aunke con duro cu e porta, pero berdad mester prevalece tur momento.
No sea compinche cu esnan cu ta practica, no sea un sostenedor di malicia y inmoralidad, pasobra den esey tambe bo sinceridad na Dios ta wordo purba.
Si bo ta na bon na altura, di locual ta agrada Dios, please no bay cana den un caminda, cu bo sa masha bon cu Dios no ta di acuerdo cu esey, no hinca bo curpa den problema, no drenta yugo desigual, corda locual e diabel a bisa Hesus y kico Hesus a responde den Mateo 4:7.
Hopi biaha hende ta hinca nan mes den situacion dificil, precario, y despues nan ta tira e falta riba Dios, y caba ta nan mes a tenta Dios.
Tur locual nos ta haci den boluntad di Dios, Dios ta sostene, pasobra Dios ta mira cla cu ta pa agrada Dios e ta wordo haci y no pa agrada nos carni, pero pa engrandece e nomber di Dios, pa tur hende por reconoce Dios den nan bida.
Josue a bisa ami y ami cas lo sirbi Senjor ( Josue 24:15). Esey ta locual Dios kier di nos , pa nos cas , nos bida, nos famia . Ta un ehempel di sirbidornan di Dios, pasobra esey ta agrada Dios.
Un hogar di testimonio, un bida cu ta ehempel pa nos yuinan, pa nan por mira con nos ta stima Dios, y tambe mira con bendicion ta yena den cas, y con Dios ta defende nos hogar.
Awendia nos tin di wak bon ora nos ta sigi modelo di hende, ora nos ta wak riba hende, pasobra hende semper por faya, pero Dios nunca ta faya, pesey nos mester tin e mente di Cristo Hesus, para firme den Su palabra, tene duro na Su man, pa asina nos no tambalia, pasobra e dianan ta duro y e tempo ta trabahoso y dificil.
Den 2 Timoteo 3:1-5 . Pablo ta papia di tempo trabahoso, y nos ta bibando den dje, y nos ta mira cuanto cos hende ta haci, con karakter di hende ta cambia, cu nan ta bira stima di di placer, mas cu Dios, cu hende ta aparenta,pero nan no ta sincero cu Dios.
Y ken lo por haci boso danjo, si cu tur zelo boso ta sigi loke ta bon. ( 1 Pedro 3:13).
Y mantene un bon consenshi,asina cu si acaso boso wordo calumnia, esnan cu falsamente ta acusa boso bon conducta,den Cristo por keda na berguensa.
Sirbi Senjor cu un curason sincero, y no haci bofon.
Sinceramente, Pastor Marcel Balootje
