2025 Tabata un aña cu mashar hopi noticianan cualnan tabata bale la pena pa sigui. E guera na Ucraina a sigui su curso, maske e dianan aki atrobe tin negociacionnan. Trump a yama Putin y después a reuni cu Zelinsky. Tin diferencianan cualnan ta haci un acuerdo di Paz duradero difícil. Si elimina e diferencianan aki, por cuminsa papia di un paz duradero. E paisnan di UE (Union Europeo) y Inglatera kier un Cese al Fuego=wapen-stilstaand pero nan no kier papia di un paz duradero cu ta elimina e obstaculonan cualnan a crea e guera, e posición di Rusia.
Na Gaza parce tin un Cese al fuego , pero mortonan ta sigui cay. Israel no ta respeta nada, pasobra nan sa cu nan tin e apoyo di Merca y di paisnan di UE y Inglatera. E problemanan di Iran cu Merca y Israel ta sigui menasa. Na Taiwan, aki tambe Merca ta sigui cu su política controversial. Nan ta reconoce Taiwan como parti di China, pero toch nan ta sigui apoya e gobierno di Taiwan cu ayudo militar.
Trump den su Gobernacion for di januari, sigur a trece hopi noticianan, cualnan mayoría ta controversialnan pa motibo cu nan no ta respeta leynan internacional, pero unda Trump solamente ta wak e interés di USA. Por ehempel: Haci Canada y Greenlandia estadonan di USA, pa Merca bira doño di e riqueza den suelo di e paisnan aki. Haci Panama un protectorado di Merca y Merca ta bira doño di e Canal. Tur esakinan y hopi mas tabata noticia e aña aki, pero loke a resalta pa nos na Aruba ta e sucesonan na Venezuela.
Merca a crea un guera psicológico, cu su Cartel de los Soles, Regime Change y blokeo.
Relaciona cu Venezuela Gobierno/Trump a trece hopi noticianan/informacionnan dudoso, cualnan a haci di Trump y su Gobierno ta sigui di ta un creador di hopi controversianan y cada biaha un mas grandi cu e esun prome. Pero ta bisto si cu tur, sea grandi o chikito, tur a resulta di ta malinformacionnan, otronan ta mentira. Tur ta acciónnan di Merca, cualnan ta bisto te awe, cu nan tur a fracasa. Conclusión di hopi hende y di specialistanan arriba terreno di política Internacional ta: Cu for di e conflicto aki, Maduro/Venezuela ta saliendo como ganador y Trump/USA como e gran perdedor.
Trump a inicia un guera psicológico, bisando cu na Venezuela ainda ta existi e cartel di droga, Cartel de los Soles, cual tabata existi den e epoca di Pablo Escobar, como 30 pa 40 aña pasa. Na cabes Nicolas Maduro y Trump a pone un Prijs ariba su cabes, bibu o morto, di 50 miyon dollar. Un abuso. Un flota di bapornan di guera a ser manda pa patruya pafor di awanan territorial di Venezuela for di augustus 2025, pa prefeni cu droga ta sali for di Venezuela pa Merca. Anto DEA cu ta e agencia di Merca pa combati droga ta confirma cu e cantidad di droga cu ta sali pa Merca for di Venezuela ta minimal, casi cero. Igualmente ta e Raportahe di UNO arriba e trafico di droga den nos hemisferio. Toch gobierno Trump ta sigui cu su storianan pa hende wak spiritu enbes di droga. Pa purba di duna balor na nan storianan, Merca a ataca hala di lanchanan, mayoría ta di piscadornan di Trinidad and Tobago, di Venezuela y di Colombia. E cantidad di victimanan mortal a surpasa 100 hende inocente. Merca no a demonstra ningún prueba di droga for di e lanchanan. Hasta nan a mata piscadornan cu tabata pidi yudansa. Un crimen, un abuso grandi Merca a comete contra hendenan inocente!!
E rol di MCM (Maria Corina Machado) cu su premio nobel y su bravuranan.
Na mesun momento cu e guera psycologico tabata surgiendo, e comisión pa saca e premionan Nobel tur aña a dicidi di nombra MCM como ganador di e premio Nobel di Paz.
Esaki después cu MCM a bisa den declaraciónnan:
- Si e bira presidente di Venezuela, e lo privatisa tur riqueza di Venezuela y Merca por cumpra tur cos na prijs di baca flaco, netamente loke Trump semper a desea.
- Tambe MCM a declara cu e ta apoya USA pa comete actonan di guera, pidiendo invasión militar Norte-Americano, contra su país y contra e pensamento di paz.
Un desicion hopi straño, cual a hinca e comité cu ta selecta e personanan pa e premionan nobel den problema grandi ya cu hendenn na mundo cu un pensamento serio y correcto a cuestiona e decisión aki di e comité, severamente. Claramente e decisión di e comité a tene cuenta cu e política di Trump pa un regime Change.
Aserca e campaña di su siguidornan a mustra su supuesto bravuranan con e a hui di Venezuela. Subiendo un lancha na costa di Venezuela, djey subi trapi di un helicopter cu a bahe na costa di Corsow, pa después e sigui su viahe pa Oslo. Prome Mininistro di Corsow Pisas, den un declaración diplomático, a bisa cu MCM ta “gaña”. Nunca e a yega Corsow.
Blokeo naval di Venezuela dor di Merca.
Ultimo simannan e presencia di Bapornan di guera Mericano dilanti costa Venezolano a ricibi otro orden. Según Trump/Merca nan no t’ey mas pa prefeni cu droga ta sali di Venezuela, pero awor nan ta blokea Venezuela pa e PETROLI VENEZOLANO no sali pa otro paisnan cu no ta Merca. Chevron so por exorta petroli pa Merca. Pues pa tur hende cu dos placa di sinti, ta bisto cu e asunto di Cartel de los Soles ta un invento, un mentira di gobierno Trump. Awor Trump a kita su mascarada y a trece e berdad di loke gobierno Trump kier: Cual ta e Petroli Venezolano.
Merca a PIRATEA dos tankero cu Petroli, hibanan Texas y bende e petroli eynan.
Guardia Costa Mericano a purba di piratea otro tankero Irani yama “Bella 1”, pero nan no a logra subi e barco, ya cu e tankero no a obedece e gritonan di comando di Guardia Costa Mericano y nan a cambia di ruta 180 grado y bay dirección di Oceano Atlantico. A sigui un persecución di un dia y e tankero a hui. Guardia Costa mericano a duna declaración den congreso Mericano, cu nan no tin capacidad, ni personal suficiente pa e sorto di trabaonan aki. Na mesun momento Venezuela y su paisnan aliado a cuminsa pone militarnan arma ariba e tankeronan pa preveni cu Guardia Costa di Merca ta sigui cu su accionna di pirata.
Mientrastanto Trump a declara, igualmente na loke John Bolton, e ministro di Seguridad Nacional di Gobierno Trump na 2019 a declara, cu tur rikesa den suelo di Venezuela ta pertenece na Merca. Trump a bisa acerca cu ta horta Venezuela a horta tur e rikesanan aki di Merca y Venezuela mester duna Merca bek tur e rikesanan aki. Trump cu e declaración aki a demonstra cu e ta “wrong and strong”, mandando un mensaje na mundo cu e no ta respeta leynan internacional, ni reglanan di hendenan di bon boluntad. Un declaración absurdo.
Mientrastanto Venezuela a percura cu su defensa nacional ta fuerte. Merca mes a pusha Maduro pa busca su aliadonan den e campo político di paisnan cu no ta di acuerdo cu e política di Merca, manera Rusia, China y Iran. E armanan cu Presidente Maduro y su gobierno a ricibi ta armanan hopi sofestica y poderoso contra cualnan Merca no tin defensa. Acerca Venezuela mes tin un ehercito poderoso y un milicia grandisimo.
Por bisa cu por lo pronto e accionnan di pirata di Merca a fracasa.
Un política nobo den e hemisferio Latino-America. Ayoo Doctrina Monroe
Den e politica/asunto aki, después cu e política di Merca a sigui un caminda di fracaso pa fracaso, loke ta sosode aki, tur hende mester por comprende claramente kico ta pasando.
E politica di e mundo Unilateral, unda Merca y Nato tabata determina tur cos na nivel Geo-politico a termina poco tempo pasa y nos ta ariba un caminda rumbo pa e mundo multipolar. E uzo di forsa militar pa somete pueblonan ya no tin contenido mas den e mundo multipolar awendia. E política ey a caba , nos ta biba den un otro mundo. Nos tur mester comprende esey, nos ta den un mundo nobo.
Awe nos ta wak con un imperio ta reacciona den desesperación pa motibo di a perde un poder cu e tabatin den e hemisferio aki pa 200 aña. Esaki ta Geo-politica y Maduro cu su gobierno a tuma e desicionnan correcto pa logra cu e poder di USA cu tabata domina e hemisferio aki, ta birando menos y no por defende su posición cu determinación mas, den e hemisferio aki. Tambe si tuma na consideración otro fayonan di e gobierno Trump/USA:
Su debenan nacional di 38 triyon dollar; su gastonan militar grandisimo pero sin ahustacion pa tin armanan sofestica, manera super-sonico y hyper-sonico; su necesidad grandi pa petroli; e problema EPSTEIN. Esakinan a yuda den debilita e postura Geo-Político di USA.
E papel hiba dor di Maduro, su gobierno y su pueblo ta un política ehemplar cu ta mustra mundo cu no ta algo chikito, no ta cualquier kos a sosode aki, pero ta algo cu ta defini e orden mundial. Laga nos spera cu loke ta pasando akinan ta trece un política nobo den e hemisferio aki, unda e cooperación, relacionnan nobo basa ariba e respet entre nacionnan, unda soberanía y e autodeterminacion di e pueblonan ta ricibi su balornan di acuerdo cu e derechonan internacional.
Ban spera cu e lucha hiba dor di Venezuela y su aliadonan ta yuda na crea un orden mundial nobo, unda pueblonan ta liber pa determina nan futuro, nan autodeterminacion.
Gregorio Wolff 29 dec 2025
