Poco dia pasa dos ciudad cu fortificacionnan fuerte a cay, Severodonetsk y Lysichangsk.
E dos ciudadnan cu garnizoennan grandi y mas cu 25 mil solda entre nan dos y cualnan según gobierno di Ucraina ta e baluartenan di e pais. Berdad e lucha tabata fuerte na Severodonetsk, pero na Lysichansk e lucha a bay mas facil, apesar cu aki tabata tin terenonan cu sero cual tabata den mihor posicion pa Ucraina defende, aserca Ucraina tabatin mas militar eynan. Lysichansk a cay liher despues cu ehercito di Rusia hunto cu e milicianan di Donbas a gara varios parti di e ciudad entrenan un refinaderia grandi. Despues di 2 pa 3 dia di lucha militarnan ucrainonan a cuminsa huy, gran cantidad a rindi y a entrega nan mes. Aparentemente Kiev a duna ordo pa su militarnan rindi y e militarnan Ucraino a entrega nan mes, e notiica aki mes a drenta, despues di e bataya cu soldanan Ruso a gara Lysichansk. Según Rusia 2208 militar a ser asesina, 3251 a keda herida y un cantidad grandi a ser cogi preso. E lucha na Donbas ta continua y dia pa dia Rusia ta conquista mas tereno.
Guera a bira un desaster pa Ucraina
Ucraina ta ricibiendo hopi golpi y hasta oficialnan Ucraino tabata bisa algun siman pasa cu nan trupanan ta perdiendo diariamente entre 100 y 200 solda.
Otro biaha nan tabata bisa cu nan ta perdiendo entre 500 pa mil solda pa dia.E trupanan di Ucraina ta ricibi golpi tras golpi. Tur caminda nan ta ricibi slanan duro, trupanan ta deserta, otronan ta rendi, cual ta logico tambe ya cu Ucraina no tin poder den laira, den espacio area. Rusia cu su avionnan y helicopternan moderno, hunto cu dronenan nan ta domina e espacio aereo. Rusia su poderia na artiyeria y su miles di tankinan ta hacie inbatible pa Ucraina. Den practica, e militarnan Ruso ta rondona e ciudad of pueblo cu nan kier conquista, nan ta prepara nan baterianan di artiyeria y despues ta cuminsa basha cayonnan pisa ariba e defensa di e militarnan Ucraino. Tambe avionnan ta yuda cu ataquenan cu nan bomnan., Despues cu a haci e daño na e defensa di Ucraina, e infanteria ta drenta den accion y conquista loke mester wordo conquista.
Pues e guera ta bira hopi dificil pa Ucraina.
Toch cada biaha atrobe for di Kiev, capital di Ucraina, ta Sali e infomacion cu e guera ta gana dor di Ucraina y pronto tur teritorio cu Rusia tin ocupa lo wordo recupera. E meta di Ucraina ta pa saca e Rusonan for di tur teritorio ocupa.
Pa Ucraina e guera a bira un desaster. Nan a perde banda di 22 pa 25% di nan teritorio, nan economia a cay cu 50%, ariba camponan di bataya ta solamente derota nan conoce.
A Sali hopi informacionnan for di USA, e.o di CNN cu conseheronan di Biden na White House a cuminisa debati con ta e mihor forma pa convence Presidente Zelensky di e realidad ariba e camponan di bataya.
E think-thank-nan pro-guera na USA.
Toch tin varios think-thanknan mericano, kendenan cu lasonan fuerte cu e industria di arma na Merca, ta keda insisti cu e presidente di Ucraina tin rason. Mas hopi e guera dura, mihor pa e industria di guera.
E Institute for the Study of War (ISW), di cual su hendenan ta liga na varios companianan di arma grandi na Merca ta promove cu na final ta Ucraina lo gana e guera. Hasta nan a bisa cu Rusia su offensiva final lo yega despues di Severodonetsk. Eynan e contraoffensiva di Ucraina ta bay cuminsa pa Ucraina recupera su teritorionan perdi. Pero e hechonan ariba campo di bataya ta indica lo contrali. Rusia, despues di conquista Sverodonetsk a sigui cu su rachanan di victoria di ciudadnan y teritorionan di Ucraina
Ora hende comprende e posicionnan di e think-thanknan liga na e industria di Arma, tur cos ta comprendibel. Awor nan posicion ta cu Ucraina mester di mas arma sofestica pa nan reconquista na terenonan perdi. Ta e Think-Thanknan aki ta esnan cu ta influencia e politiconan di USA y di e otro paisnan di Nato pa bende mas arma cu Ucraina. Tin acuerdonan di prestamo cu Ucraina pa e ricibi armanan valioso cu e lo paga despues.
Un dilema, Rusia ta ganando e guera pero Merca y Ucraina ta bisa cu nan ta gana e guera.
Algun dia pasa Merca y su aliadonan tabatin reunionnan halto, prome Union Europeo, despues e G7, cu ta un forum politico di paisnan cu economianan mas grandi y liga na Otan, consistiendo di USA, Canada, Hapon, Gran Britania, Alemania, Francia y Italia.
Mas despues ta OTAN mes a tene su encuentro.
Tur tres reunionnan a yega na e conclusion cu mester sigui cu e promesa pa continua cu e ayudo militar robusto na Ucraina
Tin e pensamento serca hopi Mericano y Europeano cu Rusia no mag di gana e guera.
Sigur pa USA, un derota pa Ucraina cual pais a ricibi tur sosten di Merca y UE, defacto Ucraina ta ser yama un proxie di Merca. Proxie ta un grupo di guereronan of militarnan di un pais cual ta ser paga pa bringa e guera di esun(nan) cu ta paga e costo militar.
Un derota di Ucraina ta trece un final na e poder Neo-liberal di USA, unda na hopi parti di mundo, ta nan ta dicta e desaroyo socio-economico. Esey nan ta yama biba den mundo democratico. Si Rusia gana e guera na Ucraina cu Merca y UE ta sosteniendo asina pisa y nan miedo ta cu un derota pa nan lo habri caminda pa Rusia hunto cu China domina Mundo.
Ta bale la pena pa menciona e comportamento di Otan den e guera aki. Enbes di yama pa compromisonan di ambos banda pa caba cu deramento di sanger, esta manera e lidernan di OTAN ta bisa cu nan ta un organisacion di paz. Pero e lidernan di Otan apidi pa e guera continua y nan haci un promesa cu nan ta sigui manda armanan te na final pa Ucraina pa yuda Ucraina gana e guera, pa hopi un guera cu Ucraina ta perdiendo y dificil pa gana.
Siman pasa a tuma lugar e reunion di G-20 (e 20 paisnan na mundo cu economia mas grandi) na Bali, Indonesia. E paisnan di G7 a pidi den e reunion aki pa prome condena Rusia y tambe pa duna Ucraina tur apoyo. Tur dos a ser rechasa.
E poder di Zelensky
Ultimo tempo ta bisto cu ta e presidente di Ucraina, Zelensky ta dicta cual ta e armanan cu nan mester. E a bira manera un sorto di malmucha cu su kier, un Chabalito, kende ta pidi loke e kier y ta ricibi nan tambe. Hecho ta cu ta Zelensky ta dirigi e politica di guera di USA y tambe di UE. E ta pidi y ta ricibi loke e pidi. Esaki ta e prijs cu Merca y UE mester paga pa tranca e deal na final di Maart 2022, unda Ucraina a bay mesa di negociacion y a yega na cierto acuerdo cu Rusia. Pero Prome Ministro di Gran Britania y un delegacion di USA a bay Kiev, nan a pidi Kiev pa bandona e acuerdo, tambe e deliberacionnan cu Rusia y sigui cu e guera. Maske den prensa occidente ta Sali informacionnan cu varios pais ta fada cu e exigencianan di Zelensky y tambe cu e armanan pidi, mas bien e artiyerianan y misilnan moderno pidi ta cabando cu e arsenalnan cu e paisnan tin warda pa nan propio ehercito y no ta 1, 2, 3, nan por bay produci e armanan aki.
Ta bisto tambe cu e ayudo di Merca na Ucraina semper tabata cu e cifra di biyonnan di dollar. E ultimo ayudo na Ucraina a baha y tin un balor di 800 miyon dollar.
Carta di Russia na Otan y USA, 17 dec 2021 pa loke ta nan seguridad
Rusia a manda un carta na USA y Otan cu nan posicionnan pa loke ta e seguridad di Rusia na december ultimo. E 3 puntonan mas importante di e carta ta lo siguiente:
- Ucraina no por drenta Otan;
- Rusia no kier mira armanan ofensivo serca di su fronteranan;
- Trupanan di Otan cualnan a ser movi pa oriente na Europa, despues di 1997, mester manda nan bek pa Europa occidente=West Europa.
Merca y Otan a haci burla di e posicionnan di Rusia poni den e carta.
E carta aki ta hopi importante, ora di yega na un pacto final despues di e guera, sigur si Rusia gana e guera, nan lo pidi pa duna balor na e carta aki.
Si Merca/Ucraina gana e guera ta mantene e status-quo y sigur Merca lo bay pusha pa un Regime Change na Rusia.
Final
Pa finalisa e situacion na Ucraina y na Europa ta keda fastioso. Na Ucraina e guera ta sigui apesar di e perdidanan grandi ariba camponan di bataya pa Ucraina. Tur dos partido kier gana e guera.
Na Europa cu ta meymey di berano, ya e preocupacionnan pa e proximo invierno ta grandi.
Hopi pais no a logra obtene for di otro paisnan e cantidad di gas cu nan a boycotea for di Rusia. Awe Rusia a cera kranchi di gas di Nort Stream I, den cual ta pasa e cantidad di gas mas hopi pa Europa Occidente. Motibo ta, pa haci trabaonan di mantencion. E pregunta ta, si Rusia ta bay habri e kranchi bek, despues di e mantencion. Esaki pasobra e paisnan di Europa tin e gas Ruso boycotea, pero ainda ta comprando algo di e gas Ruso y Rusia tin cliente pa e gas cu Europa tabata cumprando.
Gregorio Wolff
