Den Lady Ruth su memoria ta wak nan ta baila den sala di nos cas, cu un banda local tocando cu ya no ta existi mas. Ta un dushi fiesta bailabel cu a tuma luga na aña 88, dia cu Lady Ruth a organisa un dushi fiesta p’e di 33 cumpleaños di su esposo stima . Nos conoce nan pa hopi aña y aunke den e ultimo añanan nos no a “get together”, porfin nos a logra comparti un dushi koffiemorgen na Coffee House recientemente. Y hustamente riba e diaranson mainta aki dia 7 di mei, nos por a brinda tambe riba e cumpleaños di nos bon amigo Cesar Tromp, naci na aña 1952.
Nos ta corda ta wak Cesar y su bunita sra. esposa Judith, kende lo cumpli aña dia 16 di mei venidero, naci na aña 1953, ta baila yen di alegria n’e fiesta sorpresa pa Johan den nos sala memey di famia y amigonan cu a bin celebra cu nos hopi aña pasa . Por algo cera, pasobra, awo tin un bunita poema na mi curason p’e bunita y dushi pareha aki, Cesar y Judith Tromp-Laronde, kendenan recientemente tambe a cumpli nan di 50 aniversario di boda, dia 20 di december 2024 pa misa y dia 28 di november pa Raad den bon salud, alegria di nan dushi famia y cu hopi sabiduria.
E bunita fechanan na aña 1974 ta mustra leu y toch cerca, mirando cada aña cu curason yen di gradicimento y amor pa otro ayera, awe y semper. Nos ta felicita e bunita pareha aki di curason cu e siguiente palabranan poetico:
C esar y Judith, hopi bendicion y hopi pabien cu boso 50 aña felizmente casa
E dianan special ya ta tra’i lomba, pero keto bay cu hopi gradicimento na bon Dios duna
S emper hunto, semper atento cu atencion y amor pa boso precioso yiu y nietonan
A we boso por ta mas orguyoso cu nunca riba tur boso logro y metanan logra
R iba inspiracion di boso humilde curason, sigui acepta cada bendicion regala
Y cu Bon Dios sigui ilumina, inspira, proteha y bendiciona boso union di amor
J udith of Geraldine, bo a gana premio mayor den bo pareha fiel, bo guapo casa
U n relacion di amor eterno cu no tin su igual, boso amor ta unico y super special
D en ups and downs boso a siña mas di fe, amor y ternura, semper contento y fiel
I boso bida un ehempel firme, sincero y bunita di con parehanan awendia mester ta
T rankil cu confiansa y hopi fe den Dios y den boso mes cu pasenshi y curashi
H opi pabien, hopi mas aña di felicidad hunto, den salud cu cancionnan di Papa Dios canta !
Bida ta un regalo na nos tur dia pa dia. Nos ta regalonan precioso bek pa nos Creador di amor. Nos ta bendiciona pa tin bon hende den nos bida, famia y/of amigonan di berdad den sinceridad, honesto cu respet. Danki Cesar y Judith, pa ta bon amigonan ruman den Cristo di berdad. Boso ta un pareha ehemplar den hopi luz. Danki pa acepta e relato sorpresa aki skirbi cu hopi amor y cariño pa boso por sigui inspira parehanan rond di boso cu boso amor, pasion y fieldad. Danki na nos lectornan pa lesa nos relato cu atencion y pa tur bon comentario ricibi pa cu nos relatonan fielmente. Pasa un dushi dia yen di sabiduria den nos alegria! Un bearhug di Ruthy
