Mainta un habri drechi, e gay un caba di ni gorgel su garganta, cu ya tin un gang di taxista para na pia di trabou di “Snor” Perez pa mama su gay. Segun nan, nan a bin pone “saus” den e co’. Snor di su banda kiermen anochi e ta laga piedra di domino duna su contesta. Wel, e contesta no a sali manera Snor tabata idea. Den un frega di wowo, taxistanan a bay 3-0 dilanti! Snor ta purba catch up cu e score, pero cada biaha cu e yega cerca e taxistanan ta saca un borchi di “inhalen verboden” pone den su cara. E wega ta bay te 6-4 pa taxi, despues 8-6 pa taxi, y na final pauze ta bay aden cu score di 11-8 pa Taxi Boys DT.
Ambiente ta tremendo aya n’e unico y mundialmente famoso Domino Square Garden mientras e pasapalonan ta skeiro rond completamente “on the house”! Den un atmosfera colegial di pasa pret, Taxi Boys DT ta batisa nan uniform nobis nobis. Den skina, Nelson “Snor” Perez ta observa tur e fanfaria cu calma y c’un smile chikito den cachete. E sa cu cifra di statistica ta mustra cu te dia di awe niun team cu a batisa uniform contra Team Snor no a gana nan wega. E bataya ta cuminsa y Taxi ta pica dilanti cu score di 12-10, pero no mucho despues, e rabo di porco ta cuminsa krul ora Snor empata na 13-13! Sapato blanco a cuminsa cay! Ata, cos un ta leuk mas p’e taxistanan y nan a cuminsa piki pieu cu tin hungado di Team Snor sin uniform.
E wega a cuminsa bira style di un 4×4 pega den lodo di saliña. Snor ta hacie 14, Taxi ta empata na 14, Snor ta hacie 15, Taxi ta empata na 15, Snor ta yega 16, Taxi ta empat’e na 16. Snor ta pone cadena na su taira y ta sali fo’i lodo y ta yega 18. Taxi ta cuminsa ranca y ta corta bentaha na 17-18. Team Snor ta piki un punta mas, Taxi ta corta otro punta bek y e wega ta 19-18 pa Team Snor, kende ta duna fluit señal pa caba cos y den dos wega ta yega 21 pa sensacionalmente gana Taxi Boys DT cu score di 21-18! Otro tremendo anochi di domino y bon ambiente n’e unico y mundialmente famoso Domino Square Garden aya na Kudawecha. Keda pendiente shonnan, pasobra e temporada di fin di aña ta yegando cu varios candeloso bataya style di “nos-cu-nos”!
