Bisiña y famianan a uni forsa pa brinda asistencia, mientras cu instancianan di emergencia a evalua e situacion na diferente parti di Aruba.
E awacero fuerte cu a cay riba Aruba for di oranan tempran di mainta di awe a causa inundacion y daño na diferente vivienda, sorprendiendo hopi famia cu no tabata prepara pa e cantidad di awa cu a cay den un periodo relativamente cortico. A pasa na diferente area afecta, Prome Minister Mike Eman a destaca specialmente e solidaridad y convivencia cu pueblo di Aruba a demonstra den e momentonan dificil aki.
Minister Eman a bishita diferente famia afecta entre otro San Fuego, Savaneta y San Nicolas, incluyendo vivienda na Bernhardstraat. Tambe a pasa cerca ex-Gobernador Fredis Refunjol, kende su vivienda tambe tabata afecta pa e awacero.
Na diferente localidad, Prome Minister a constata cu entrada di awa a causa daño grandi na vivienda y a crea situacionnan dificil pa e residentenan. E cantidad di awa a sorprende hopi habitante, cu no a anticipa un inundacion di tal magnitud den nan vecindario.
Solidaridad entre bisiñanan a sobresali
Un di e aspectonan cu mas a impresiona, tabata e manera espontaneo cu bisiñanan, familiar y otro miembronan di comunidad a sali pa yuda otro.
Den diferente bario, ciudadanonan a uni forsa pa busca solucionnan inmediato. Algun a yuda cu pomp pa saca awa, mientras cu otro a colabora pa habri salida pa e awa, incluyendo kibra parti di cura unda tabata necesario pa alivia e acumulacion di awa.
Segun Prome Minister Eman, e actitud aki ta refleha un balor importante di nos sociedad: e disposicion di pueblo Arubano pa para hunto y brinda un man di yudansa ora un otro ta pasa den dificultad.
El a destaca cu, den momentonan di emergencia, e convivencia y e sentido di responsabilidad comparti entre bisiñanan por haci un diferencia significativo pa famianan afecta.
Instancianan di emergencia mobilisa
Durante e awacero, diferente instancia a mobilisa pa atende cu e situacion. CMO tabata notifica, mientras cu Cuerpo di Bombero y Polis a desplega personal pa evalua e condicionnan y brinda asistencia unda tabata necesario.
Tambe a solicita apoyo di e departamento di maneho di crisis pa coordina e evaluacion di e situacion y identifica e necesidadnan di famianan afecta.
Prome Minister Eman a indica cu e contacto cu e departamentonan concerni ta importante pa determina e alcance di e dañonan y evalua cua tipo di asistencia por brinda.
E precencia den areanan afecta a permiti e Prome Minister conoce di cerca e realidad di diferente famia, incluyendo vivienda cu a sufri daño como consecuencia di entrada di awa y inundacion.
Un comunidad cu ta para hunto
Prome Minister Eman a expresa su aprecio pa tur ciudadano cu, sin perde tempo, a sali pa brinda asistencia na nan bisiñanan y familiar.
El a enfatisa cu e solidaridad aki ta un expresion concreto di Bon Comun: no pensa solamente riba nos mes situacion, sino tambe riba bienestar di esnan rond di nos.
Mientras cu e instancianan concerni ta sigui evalua e consecuencia di e awacero, e Prome Minister a reafirma e importancia di mantene e colaboracion entre Gobierno, servicionan di emergencia y comunidad.
E awacero a pone diferente famia den un situacion dificil, pero alabes a demonstra e forsa di un pueblo cu, den momento di necesidad, ta sali pa yuda otro.
