Diahuebs mainta den Corte di Husticia mester a trata e caso penal cu Ministerio Publico a cuminsa contra e homber R. acusa di abuso di un mucha muher. Ta asina cu R. no a presenta den Corte y mester a bolbe pospone e caso.
SOLO DI PUEBLO por a compronde cu Hues a duna orden di detencion di R. pa asina garantiza cu e lo presenta pa tratamento di e caso.
Fiscal a pidi Hues pa pospone e caso un rato pa Fiscal pidi Polis pa bay busca e sospechoso na su cas y trec’e na Corte. Ora a sigui cu tratamento di e caso, Fiscal a bisa Hues cu no por a haya e sospechoso. Hues a dicidi cu e ta duna orden di detencion di e homber R.
E acusacion cu tin contra e homber R. ta cu entre 11 y 12 April 2024, el a abusa di un mucha muher bao di 16 aña. Ta asina cu e sospechoso R. no ta deteni.
MAMA DI VICTIMA TA PREOCUPA
E mayornan di e victima tabata presente den sala di Corte. Hues a puntra e mama, kico e ta pensa cu mester bolbe pospone e caso. E mama a bisa Hues cu e ta haya cu ta 1 aña y 6 luna a dura cu e caso y e kier pone un fin na esaki. E mama a bisa Hues cu R. ta sigui manda mensahe pa su yiu muher.
ORDEN DI DETENCION
Hues ta haya cu ta importante pa pospone e caso. E kier pa e sospechoso R. ta presente pa asina por trata e caso. Hues a bisa cu e ta pospone e caso pa 5 September 2025 pa 1.30 di merdia. Hues a duna orden di detencion di R. pa asina ta sigur cu dia 5 September 2025 ta sigui cu e caso.
